us mez par sar jhukae

ek laḌkī mujhe sketch kar rahī thī

laḌkī kī drawing agarche achchhī nahīñ thī

lekin use is qadar munhamik dekh kar

maiñ bahut mutā.assir huā

mujhe ḳhvāhish huī

ki maiñ us laḌkī kā bosa hī le luuñ

magar merā dhaḌ ġhā.eb thā

merī drawing us laḌkī se kahīñ ziyāda behtar thī

aur maiñ us kī chhātiyāñ banānā bhī chāhtā thā

jo us ke khule hue garebān se jhāñk rahī thiiñ

lekin merā baqiyā jism vahāñ nahīñ thā

use shāyad jañgalī jānvar bhañbhoḌ rahe hoñ

drawing meñ ma.amūlī dastgāh rakhne ke bāvajūd

laḌkī ne mere chehre kī udāsī ko

bhar puur tarīqe se kāġhaz par muntaqil kar diyā thā

lekin vo mere nichle dhaḌ ko

baar baar koshish ke bāvajūd

banāne meñ nākām rahī thī

mujhe lagā vo mere jism ko

jañgalī jānvaroñ se bachāne kī har mumkin koshish kar rahī hai

kyā use ma.alūm hai

agar vo is kashmakash meñ kāmyāb rahī

aur merā jism puurī tarah bāzyāb karā sakī

to mere haath

sab se pahle

kis chiiz ko chhū lenā chāheñge

ek laDki mujhe sketch kar rahi thi

laDki ki drawing agarche achchhi nahin thi

lekin use is qadar munhamik dekh kar

main bahut mutaassir hua

mujhe KHwahish hui

ki main us laDki ka bosa hi le lun

magar mera dhaD ghaeb tha

meri drawing us laDki se kahin ziyaada behtar thi

aur main us ki chhatiyan banana bhi chahta tha

jo us ke khule hue gareban se jhank rahi thin

lekin mera baqiya jism wahan nahin tha

use shayad jangali jaanwar bhanbhoD rahe hon

drawing mein mamuli dastgah rakhne ke bawajud

laDki ne mere chehre ki udasi ko

bhar pur tariqe se kaghaz par muntaqil kar diya tha

lekin wo mere nichle dhaD ko

bar bar koshish ke bawajud

banane mein nakaam rahi thi

mujhe laga wo mere jism ko

jangali jaanwaron se bachane ki har mumkin koshish kar rahi hai

kya use malum hai

agar wo is kashmakash mein kaamyab rahi

aur mera jism puri tarah bazyab kara saki

to mere hath

sab se pahle

kis chiz ko chhu lena chahenge