usne hamd likkhi hai

is qadar hasīñ chehra

is qadar hasīñ āñkheñ

ye gulāb se ruḳhsār

pal meñ tamtamā uTTheñ

pal meñ jagmagā uTTheñ

pañkhuḌī se nāzuk lab

aap hī bisoreñ aur

aap muskurā uTTheñ

mujh ko yaad aatā hai

jab tumhārī kilkārī

gūñjtī thī kamroñ meñ

jab tumhārī gul-kārī

phailtī thī bistar par

shab ko jab jagāte the

din ko jab thakāte the

aisī hukmarānī par

merī jaan jaltī thī

aur aise lamhe meñ

tum hañsī uḌāte the

tum hañsī uḌāte the

qahqahe lagāte the

kis ne ye sikhā.e sab

naaz aur adā tum ko

tum to saada kāġhaz the

tum ko maiñ ne jab paayā

tum ko maiñ ne jab dekhā

aur jis ghaḌī chūmā

kyā ajiib lamha thā

tum to āñkheñ mūñde the

aur jab khulīñ āñkheñ

hairatī thā ā.īna

muñh takā hī kartā thā

bas ḳhamosh jis-tis kā

phir jo lab hue goyā

kuchh yaqīñ na aatā thā

sab karishma-sāzī hai

ek andhe kiiḌe kī

yā zarā sī mehnat hai

is bhalī kumhāran kī

jis ke band aave meñ

kuchh ḳhabar nahīñ kyā hai

aag hai ki paanī hai

phuul hai ki chehra hai

haañ sunā ye thā maiñ ne

arsh se farishta ik

aa ke batn-e-mādar meñ

Dhāltā hai ḳhadd-o-ḳhāl

nanhe nanhe a.azā par

naqsh se banātā hai

us hasīn saa.at meñ

jis ko jitnī fursat ho

jaisī istitā.at ho

vo hunar dikhātā hai

so yaqīn hai merā

jis aziim saa.at meñ

mehrbāñ farishte ne

tum ko mujh meñ Dhālā hai

us balīġh saa.at meñ

us ne shā.irī kī hai

us ne hamd likkhī hai

is qadar hasin chehra

is qadar hasin aankhen

ye gulab se ruKHsar

pal mein tamtama uTThen

pal mein jagmaga uTThen

pankhuDi se nazuk lab

aap hi bisoren aur

aap muskura uTThen

mujh ko yaad aata hai

jab tumhaari kilkari

gunjti thi kamron mein

jab tumhaari gul-kari

phailti thi bistar par

shab ko jab jagate the

din ko jab thakate the

aisi hukmarani par

meri jaan jalti thi

aur aise lamhe mein

tum hansi uDate the

tum hansi uDate the

qahqahe lagate the

kis ne ye sikhae sab

naz aur ada tum ko

tum to sada kaghaz the

tum ko main ne jab paya

tum ko main ne jab dekha

aur jis ghaDi chuma

kya ajib lamha tha

tum to aankhen munde the

aur jab khulin aankhen

hairati tha aaina

munh taka hi karta tha

bas KHamosh jis-tis ka

phir jo lab hue goya

kuchh yaqin na aata tha

sab karishma-sazi hai

ek andhe kiDe ki

ya zara si mehnat hai

is bhali kumhaaran ki

jis ke band aawe mein

kuchh KHabar nahin kya hai

aag hai ki pani hai

phul hai ki chehra hai

han suna ye tha main ne

arsh se farishta ek

aa ke batn-e-madar mein

Dhaalta hai KHadd-o-KHal

nanhe nanhe aaza par

naqsh se banata hai

us hasin saat mein

jis ko jitni fursat ho

jaisi istitaat ho

wo hunar dikhata hai

so yaqin hai mera

jis azim saat mein

mehrban farishte ne

tum ko mujh mein Dhaala hai

us baligh saat mein

us ne shairi ki hai

us ne hamd likkhi hai