us se kah do

is se kah do ki vo apne dikhte hue bāzuoñ ko yūñhī tah rakhe

rāhdārī ke parle sire par vo kis se milegī

koī ḳhvāb rātoñ kī bojhal havā meñ kisī par sameTe parinde kā ḳhvāb

koī ḳhvāb bīmār bistar pe bujhte samay

raat ke narm paañv guzarne kā ḳhvāb

band kamre meñ dopahar bhar sirf ik zer jaame meñ sone kā ḳhvāb

yā koī āñganoñ meñ utartī huī aañkh kī koñpaloñ se ulajhtī huī dhuup

bhak se uḌ jaane vaalī surañgoñ kī mānind bichhtī huī dhuup

muñh añdhere ye dāñtoñ tale kirkirātī huī dhuup

us se kah do kahīñ bhī koī ḳhvāb ho dhuup ho

nisf-shab apne shauhar ke pahlū se uThtī huī

nīm-tārīk ziine se tham tham utartī huī

ek be-ant

lambī masāfat pe phailī huī rāhdārī ke parle sire par vo kis se milegī

us se kah do darīche ke parde girā de

ki khiḌkī se aatī huī raushnī gard hī gard hai

magar taaq bhī apnī nam-ḳhurdgī meñ baḌā zahr hai

us se kah do ki vo apne dikhte hue bāzuoñ ko yūñhī tah rakhe

is se kah do ki wo apne dikhte hue bazuon ko yunhi tah rakhe

rahdari ke parle sire par wo kis se milegi

koi KHwab raaton ki bojhal hawa mein kisi par sameTe parinde ka KHwab

koi KHwab bimar bistar pe bujhte samay

raat ke narm panw guzarne ka KHwab

band kamre mein dopahar bhar sirf ek zer jame mein sone ka KHwab

ya koi aanganon mein utarti hui aankh ki konpalon se ulajhti hui dhup

bhak se uD jaane wali surangon ki manind bichhti hui dhup

munh andhere ye danton tale kirkiraati hui dhup

us se kah do kahin bhi koi KHwab ho dhup ho

nisf-shab apne shauhar ke pahlu se uThti hui

nim-tarik zine se tham tham utarti hui

ek be-ant

lambi masafat pe phaili hui rahdari ke parle sire par wo kis se milegi

us se kah do dariche ke parde gira de

ki khiDki se aati hui raushni gard hi gard hai

magar taq bhi apni nam-KHurdgi mein baDa zahr hai

us se kah do ki wo apne dikhte hue bazuon ko yunhi tah rakhe