us shahr ke liye

kuchh lamhe

us shahr ke liye

jahāñ bāheñ phailā.e

rāteñ kartī haiñ shāmoñ kā intizār

aur dopahar baad khiḌkiyoñ par utartī haiñ

alsā.ī sub.heñ

jahāñ samay itnā taral hai

ki mushkil hai bāñTanā use

raat din sub.h aur shāmoñ meñ

kuchh bāteñ

us shahr ke liye

jahāñ asankhya darvāzoñ se ho kar

pahuñchtā hai itihās

aur kho jaatā hai

qiloñ mīnāroñ mahloñ aur mehrāboñ meñ

jahāñ chāñdnī itnī chaTaḳh hai

aur havā.eñ itnī bātūnī

ki sadiyoñ purānī bāteñ bhī aise lagtī haiñ

jaise tum ne abhī abhī

kānoñ meñ kuchh kahā ho

kuchh rang

us shahr ke liye

jahāñ degoñ kḌāhiyoñ maTkoñ aur surāhiyoñ se

jhartī hai svaad kī resham

jahāñ milte haiñ sunahre aam

nārañgī santare aur surḳh tarbūz

jahāñ kaale naqāb kī aaḌ se

jhāñktī haiñ

motī kī tarah sundar striyāñ

aur phir Duub jaatī hai

ghar-girhastī ke ma.amūlī taqāzoñ meñ

jahāñ nazar-bhar

dikhte haiñ sirf log hī log

jin ke hoñToñ par

garam havā ke bāvajūd

bachī huī haiñ ummīd kī kattha.ī muskāneñ

kuchh phuul

us shahr ke liye

jo umas bharī rātoñ meñ ugtā hai

nirbhr taare sā jagmag

aur tair jaatā hai bādaloñ kī tarah

udaas āñkhoñ meñ anāyās

jo champa.ī gajre kī tarah ghultā hai sāñsoñ meñ

aur phir bikhar jaatā hai thir

sāgar kī bechain hatheliyoñ par chup-chāp

jahāñ sapne sachchā.iyoñ ko

aise gherte haiñ

jaise dimāġh ko ghertā hai nasha

kuchh dhuup

us shahr ke liye

jis ke baare meñ

al-bairūnī aur huen-tsang se bhī ziyāda

jāntā hai ek rikshe vaalā

aur jis kī barakat ke liye

kisī hākim se ziyāda fikrmand hai vo faqīr

jis kī chaukhaT chūmte haiñ

kabūtar hazār

gaate abūjh gaan phaḌ.phaḌāte pañkh

toḌte saa.e sannāToñ ke

likhte ibārateñ amn kī

nafratoñ ke ākāsh par

binā thake-hāre

kuchh duā.eñ

us shahr ke liye

jis ke ujāloñ meñ hai hamārā aks

aur jis ke añdheroñ meñ hai

hamārī chāhatoñ kā sañgīt

jis kī havāoñ meñ

sadiyoñ tak tairtī rahegī

hamāre ḳhayāloñ kī ḳhushbū

vo shahr jo ab hamārā bhī utnā hai

jitnā un kā

jo us ke āñgan meñ pīḌhiyoñ se ābād haiñ

ek aise samay meñ

jahāñ ḳhud ke alāva

kisī aur ke baare meñ

kuchh bhī sochne kā chalan nahīñ hai

merī dost

aao saath mil kar us shahr kī salāmatī kī duā kareñ

aao apne pākīza chumbanoñ se

us kī nazar utāreñ

aao le chaleñ use apne saath

jahāñ tak saath chal sake itihās

saath chal sakeñ ismartiyāñ

kuchh lamhe

us shahr ke liye

jahan bahen phailae

raaten karti hain shamon ka intizar

aur dopahar baad khiDkiyon par utarti hain

alsai subhen

jahan samay itna taral hai

ki mushkil hai banTana use

raat din subh aur shamon mein

kuchh baaten

us shahr ke liye

jahan asankhya darwazon se ho kar

pahunchta hai itihas

aur kho jata hai

qilon minaron mahlon aur mehrabon mein

jahan chandni itni chaTaKH hai

aur hawaen itni baatuni

ki sadiyon purani baaten bhi aise lagti hain

jaise tum ne abhi abhi

kanon mein kuchh kaha ho

kuchh rang

us shahr ke liye

jahan degon kDahiyon maTkon aur surahiyon se

jharti hai swad ki resham

jahan milte hain sunahre aam

narangi santare aur surKH tarbuz

jahan kale naqab ki aaD se

jhankti hain

moti ki tarah sundar striyan

aur phir Dub jati hai

ghar-girhasti ke mamuli taqazon mein

jahan nazar-bhar

dikhte hain sirf log hi log

jin ke honTon par

garam hawa ke bawajud

bachi hui hain ummid ki katthai muskanen

kuchh phul

us shahr ke liye

jo umas bhari raaton mein ugta hai

nirbhr tare sa jagmag

aur tair jata hai baadalon ki tarah

udas aankhon mein anayas

jo champai gajre ki tarah ghulta hai sanson mein

aur phir bikhar jata hai thir

sagar ki bechain hatheliyon par chup-chap

jahan sapne sachchaiyon ko

aise gherte hain

jaise dimagh ko gherta hai nasha

kuchh dhup

us shahr ke liye

jis ke bare mein

al-bairuni aur huen-tsang se bhi ziyaada

jaanta hai ek rikshe wala

aur jis ki barakat ke liye

kisi hakim se ziyaada fikrmand hai wo faqir

jis ki chaukhaT chumte hain

kabutar hazar

gate abujh gan phaDphaDate pankh

toDte sae sannaTon ke

likhte ibaraten amn ki

nafraton ke aakash par

bina thake-haare

kuchh duaen

us shahr ke liye

jis ke ujalon mein hai hamara aks

aur jis ke andheron mein hai

hamari chahaton ka sangit

jis ki hawaon mein

sadiyon tak tairti rahegi

hamare KHayalon ki KHushbu

wo shahr jo ab hamara bhi utna hai

jitna un ka

jo us ke aangan mein piDhiyon se aabaad hain

ek aise samay mein

jahan KHud ke alawa

kisi aur ke bare mein

kuchh bhi sochne ka chalan nahin hai

meri dost

aao sath mil kar us shahr ki salamati ki dua karen

aao apne pakiza chumbanon se

us ki nazar utaren

aao le chalen use apne sath

jahan tak sath chal sake itihas

sath chal saken ismartiyan