use maine nahin dekha

vo kaisī hai

use maiñ ne nahīñ dekhā

sunā hai vo zamīñ-zādī

dhanak se apne ḳhvāboñ ke ufuq gul-rañg rakhtī hai

mire ḳhāshāk se aage kisī manzar meñ rahtī hai

havā ke ghar meñ rahtī hai

vo kis sūraj kā hissa hai

vo kis taare kī miTTī hai

use maiñ ne nahīñ dekhā

mirī āñkhoñ se le kar us kī āñkhoñ tak kise ma.alūm hai

kitne sitāre haiñ

mujhe kyā ilm vo kis rañg ke kapḌe pahantī hai

vo ḳhālī bartanoñ meñ apnā din kaise biTātī hai

vo ḳhushiyāñ DhūñDtī hai aur ḳhud ko band almārī meñ rakh kar

bhuul jaatī hai

vo ghar ke lawn meñ baiThī bahut kuchh sochtī hogī

ki merā rañg kaisā hai

mirī āñkhoñ ke raushan qumqumoñ meñ taab kitnī hai

mirī shiryān meñ sahme hue bachchoñ pe kyā guzrī

vo kis raste pe chal nikle ki apne ghar nahīñ pahuñche

vo akasr sochtī hogī

mire kamre meñ būḌhī fāhisha tanhā.ī ke hote

mire din kaise kaTte haiñ

mirī be-ḳhvāb rāteñ kin ḳhayāloñ meñ guzartī haiñ

kahāñ ishq-e-gurezāñ kī kahānī ḳhatm hotī hai

vo ghar ke lawn meñ baiThī yahī kuchh sochtī hogī

ki mere naam ke pīchhe mirī tasvīr kaisī hai

mire ḳhat bhī nahīñ us ke tasarruf meñ

ki un ko khol kar mere badan ke raaz tak pahuñche

mujhe us ne nahīñ dekhā

na maiñ ne us ko dekhā hai

na us ne mujh ko dekhā hai

magar apnī mohabbat meñ ajab husn-e-tavāzun hai

vo akasr sochtī hogī

maiñ kitnā apne daftar meñ huuñ kitnā ghar kī ḳhalvat meñ

vo mujh ko mujh pe hī taqsīm kar ke dekhtī hogī

mujhe mahsūs hotā hai

koī dil chīrtī ḳhushbū mujhe āvāz detī hai

magar āvāz ke pīchhe koī chehra nahīñ hotā

vo mujh ko dekh letī hai

magar merī basārat meñ mahak chehra nahīñ paatī

ki ḳhushbū kis ne dekhī hai

sadā ko kis ne pakḌā hai

makānī dūriyāñ kaisī? zamānī qurbateñ kaisī?

vo merā jism hai lekin use maiñ ne nahīñ dekhā

wo kaisi hai

use main ne nahin dekha

suna hai wo zamin-zadi

dhanak se apne KHwabon ke ufuq gul-rang rakhti hai

mere KHashak se aage kisi manzar mein rahti hai

hawa ke ghar mein rahti hai

wo kis suraj ka hissa hai

wo kis tare ki miTTi hai

use main ne nahin dekha

meri aankhon se le kar us ki aankhon tak kise malum hai

kitne sitare hain

mujhe kya ilm wo kis rang ke kapDe pahanti hai

wo KHali bartanon mein apna din kaise biTati hai

wo KHushiyan DhunDti hai aur KHud ko band almari mein rakh kar

bhul jati hai

wo ghar ke lawn mein baiThi bahut kuchh sochti hogi

ki mera rang kaisa hai

meri aankhon ke raushan qumqumon mein tab kitni hai

meri shiryan mein sahme hue bachchon pe kya guzri

wo kis raste pe chal nikle ki apne ghar nahin pahunche

wo akasr sochti hogi

mere kamre mein buDhi fahisha tanhai ke hote

mere din kaise kaTte hain

meri be-KHwab raaten kin KHayalon mein guzarti hain

kahan ishq-e-gurezan ki kahani KHatm hoti hai

wo ghar ke lawn mein baiThi yahi kuchh sochti hogi

ki mere nam ke pichhe meri taswir kaisi hai

mere KHat bhi nahin us ke tasarruf mein

ki un ko khol kar mere badan ke raaz tak pahunche

mujhe us ne nahin dekha

na main ne us ko dekha hai

na us ne mujh ko dekha hai

magar apni mohabbat mein ajab husn-e-tawazun hai

wo akasr sochti hogi

main kitna apne daftar mein hun kitna ghar ki KHalwat mein

wo mujh ko mujh pe hi taqsim kar ke dekhti hogi

mujhe mahsus hota hai

koi dil chirti KHushbu mujhe aawaz deti hai

magar aawaz ke pichhe koi chehra nahin hota

wo mujh ko dekh leti hai

magar meri basarat mein mahak chehra nahin pati

ki KHushbu kis ne dekhi hai

sada ko kis ne pakDa hai

makani duriyan kaisi? zamani qurbaten kaisi?

wo mera jism hai lekin use main ne nahin dekha