uThenge maut se pahle

uTheñge maut se pahle usī safar ke liye

jise hayāt ke sadmoñ ne multavī na kiyā

vo ham ki phuul kī lau ko fareb dete the

qarīb-e-shām sitāroñ kī rahguzar pe chale

vo ham ki taaza jahāñ ke naqīb-e-zan the na.e

sabā kī chaal se aage hamārī chaal rahī

magar gumān ke qadmoñ ne us ko tai na kiyā

vahī safar jo hamāre aur us ke biich rahā

jise hayāt ke sadmoñ ne multavī na kiyā

uThā ke haath meñ neze pilā ke āb-e-sarāb

kamīn-gāh-e-havas se nishāne dil ke liye

tamām samt se aa.ī shahābiyoñ kī sipāh

hamārī zaat ko gherā misāl-e-lashkar-e-shām

hazār baar ulajh ke phaTā libās-e-yaqīñ

magar Talī na kabhī us mubāhise se zabāñ

jo sākinān-e-zamīñ aur hamāre biich huā

rah-e-vaqār pe baiThe the aa.ine le kar

jinheñ sabāt pe koī bhī iḳhtiyār na thā

thamā ke haath meñ ġham ke burāq-e-dil kī inaañ

nikal ga.e na ruke ruuh kī hadoñ se idhar

falak ke kohna darīche salām karte rahe

magar charāġh kā saaya abhī vajūd meñ hai

zarūr apne hisāroñ meñ legā nūr-e-dimāġh

sahar ke vaqt baḌhegā ġhunūdgī kā asar

darāz hogā vahīñ dard ke shabāb kā qad

milā ġhubār kī sūrat jahāñ nasīb kā phal

jahāñ shikār huā hai mirī zabāñ kā hunar

vahīñ se DhūñD ke lā.eñge aadmī kī ḳhabar

uTheñge maut se pahle usī safar ke liye

uThenge maut se pahle usi safar ke liye

jise hayat ke sadmon ne multawi na kiya

wo hum ki phul ki lau ko fareb dete the

qarib-e-sham sitaron ki rahguzar pe chale

wo hum ki taza jahan ke naqib-e-zan the nae

saba ki chaal se aage hamari chaal rahi

magar guman ke qadmon ne us ko tai na kiya

wahi safar jo hamare aur us ke bich raha

jise hayat ke sadmon ne multawi na kiya

uTha ke hath mein neze pila ke aab-e-sarab

kamin-gah-e-hawas se nishane dil ke liye

tamam samt se aai shahabiyon ki sipah

hamari zat ko ghera misal-e-lashkar-e-sham

hazar bar ulajh ke phaTa libas-e-yaqin

magar Tali na kabhi us mubahise se zaban

jo sakinan-e-zamin aur hamare bich hua

rah-e-waqar pe baiThe the aaine le kar

jinhen sabaat pe koi bhi iKHtiyar na tha

thama ke hath mein gham ke buraq-e-dil ki inan

nikal gae na ruke ruh ki hadon se idhar

falak ke kohna dariche salam karte rahe

magar charagh ka saya abhi wajud mein hai

zarur apne hisaron mein lega nur-e-dimagh

sahar ke waqt baDhega ghunudgi ka asar

daraaz hoga wahin dard ke shabab ka qad

mila ghubar ki surat jahan nasib ka phal

jahan shikar hua hai meri zaban ka hunar

wahin se DhunD ke laenge aadmi ki KHabar

uThenge maut se pahle usi safar ke liye