unche darje ka sailab

zamīñ kā husn sabza hai

magar ab sabz pate zard ho kar jhaḌte jaate haiñ

bahāreñ dair se aatī haiñ

jugnū hai na titlī ḳhushbūoñ... se rañg rūThe haiñ

jahāñ jañgal huā karte the aur bārish dhanak le kar utartī thī

jahāñ barsāt meñ koyal, papīhe chahchahāte the

vahāñ ab ḳhaak uḌtī hai

daraḳhtoñ kī kamī se aa ga.ī hai dhuup meñ shiddat

fazā kā mehrbāñ haala pighaltā jā rahā hai

āsmāñ tāñbe meñ Dhaltā jā rahā hai

is liye be-mehr mausam ab satāte haiñ

dhueñ ke, gard ke, ālūdgī ke, shor ke mausam

galī, kūchoñ, gharoñ meñ kār-ḳhānoñ meñ bas ab

saḌak par shor bahtā hai

sunā.ī hī nahīñ detā hamārā dil jo kahtā hai

mohabbat kā parinda āj-kal ḳhāmosh rahtā hai

parinde pyaas meñ Duube haiñ aur paanī nahīñ piite

ki dariyāoñ kī shiryānoñ meñ ab shaffāf paanī kī jagah ālūdgī kā zahr hai

hameñ jab bahr o bar kī hukmarānī dī ga.ī hai to ye ham ko sochnā hogā

zamīnoñ, pāniyoñ, māhaul kī bīmāriyoñ kā koī mudāvā hai

kahīñ in kā sabab ham to nahīñ bante?

sabab koī bhī ho āḳhir mudāvā kuchh to karnā hai

ye tasvīr-e-jahāñ hai rañg is meñ ham ko bharnā hai

zamin ka husn sabza hai

magar ab sabz pate zard ho kar jhaDte jate hain

bahaaren dair se aati hain

jugnu hai na titli KHushbuon se rang ruThe hain

jahan jangal hua karte the aur barish dhanak le kar utarti thi

jahan barsat mein koyal, papihe chahchahate the

wahan ab KHak uDti hai

daraKHton ki kami se aa gai hai dhup mein shiddat

faza ka mehrban haala pighalta ja raha hai

aasman tanbe mein Dhalta ja raha hai

is liye be-mehr mausam ab satate hain

dhuen ke, gard ke, aaludgi ke, shor ke mausam

gali, kuchon, gharon mein kar-KHanon mein bas ab

saDak par shor bahta hai

sunai hi nahin deta hamara dil jo kahta hai

mohabbat ka parinda aaj-kal KHamosh rahta hai

parinde pyas mein Dube hain aur pani nahin pite

ki dariyaon ki shiryanon mein ab shaffaf pani ki jagah aaludgi ka zahr hai

hamein jab bahr o bar ki hukmarani di gai hai to ye hum ko sochna hoga

zaminon, paniyon, mahaul ki bimariyon ka koi mudawa hai

kahin in ka sabab hum to nahin bante?

sabab koi bhi ho aaKHir mudawa kuchh to karna hai

ye taswir-e-jahan hai rang is mein hum ko bharna hai