uzr-e-gunah

jān-e-man mujh se bajā hai ye shikāyat terī

ki mire sher meñ maazī kā vo andāz nahīñ

jo mirī nazm ko ilhām banā detā thā

aaj kyoñ mere taḳhayyul meñ vo e.ajāz nahīñ

jis ne baḳhshī thī mirī fikr-e-rasā ko me.arāj

aaj kyoñ merī tabī.at meñ vo parvāz nahīñ

ab kahāñ ahd-e-javānī ke vo afkār-e-jamīl

aaj kyoñ apne tafakkur pe mujhe naaz nahīñ

dekh kar tū mujhe ḳhāmosh isī soch meñ hai

vaqt-o-māhaul hai nā-sāz ki vo saaz nahīñ

ai mujhe 'hāfiz'-o-'ḳhayyām' banāne vaalī

mere sheroñ meñ vo sar-mastī-e-shīrāz nahīñ

jo tirī ruuh ko naġhmoñ ko jagā detī thī

ab mire bas meñ vo mausīqī-e-āvāz nahīñ

jo tujhe loriyāñ de de ke sulātā thā kabhī

ab mire paas vo āhang-e-fusūñ-sāz nahīñ

apnī āshuftagī-e-fikr-o-nazar kā baa.is

aaj maiñ tere liye māya-e-e.azāz nahīñ

tū magar vahm ke baa.is ye samajh baiThī hai

tū bhī merī nigah-e-shauq meñ mumtāz nahīñ

ai mirī nazm ko ilhām batāne vaalī

ab taḳhayyul kā ye ilhām fusūñ-sāz nahīñ

hai koī aur hī quvvat jo badaltī hai hameñ

inqilāb-e-falak-e-sho.abada-pardāz nahīñ

kaash tū merī ḳhamoshī kī sadā sun saktī

naġhma-ḳhvānī ke liye hājat-e-āvāz nahīñ

maiñ tujhe loriyāñ de de ke sulā.ūñ kyūñ-kar

merī duniyā meñ kahīñ ḳhvāb-gah-e-nāz nahīñ

vo bahāreñ vo umangeñ vo tamanna vo shabāb

ahd-e-hāzir kī fazā un ke liye saaz nahīñ

mo'tarif huuñ maiñ ba-dastūr mohabbat kā tirī

lekin ab apnī mohabbat pe mujhe naaz nahīñ

DhūñDhtā huuñ ġham-e-hastī kā vo anjām 'ra.īs'

aql kahtī hai ki jis kā koī āġhāz nahīñ

jaan-e-man mujh se baja hai ye shikayat teri

ki mere sher mein mazi ka wo andaz nahin

jo meri nazm ko ilham bana deta tha

aaj kyon mere taKHayyul mein wo eajaz nahin

jis ne baKHshi thi meri fikr-e-rasa ko mearaj

aaj kyon meri tabiat mein wo parwaz nahin

ab kahan ahd-e-jawani ke wo afkar-e-jamil

aaj kyon apne tafakkur pe mujhe naz nahin

dekh kar tu mujhe KHamosh isi soch mein hai

waqt-o-mahaul hai na-saz ki wo saz nahin

ai mujhe 'hafiz'-o-'KHayyam' banane wali

mere sheron mein wo sar-masti-e-shiraaz nahin

jo teri ruh ko naghmon ko jaga deti thi

ab mere bas mein wo mausiqi-e-awaz nahin

jo tujhe loriyan de de ke sulata tha kabhi

ab mere pas wo aahang-e-fusun-saz nahin

apni aashuftagi-e-fikr-o-nazar ka bais

aaj main tere liye maya-e-eazaz nahin

tu magar wahm ke bais ye samajh baiThi hai

tu bhi meri nigah-e-shauq mein mumtaz nahin

ai meri nazm ko ilham batane wali

ab taKHayyul ka ye ilham fusun-saz nahin

hai koi aur hi quwwat jo badalti hai hamein

inqilab-e-falak-e-shoabada-pardaz nahin

kash tu meri KHamoshi ki sada sun sakti

naghma-KHwani ke liye hajat-e-awaz nahin

main tujhe loriyan de de ke sulaun kyun-kar

meri duniya mein kahin KHwab-gah-e-naz nahin

wo bahaaren wo umangen wo tamanna wo shabab

ahd-e-hazir ki faza un ke liye saz nahin

mo'tarif hun main ba-dastur mohabbat ka teri

lekin ab apni mohabbat pe mujhe naz nahin

DhunDhta hun gham-e-hasti ka wo anjam 'rais'

aql kahti hai ki jis ka koi aaghaz nahin