wada

aurat ek tasavvur hai ek ḳhvāb hai

rah rah ke apnī samt khīñchtā hai jo

be-sūd armānoñ meñ nasl-e-ādam ke

phir se ek ubaal jo taarī kare

zamāna-bhar kī pastiyoñ meñ

ek ḳhalal paidā kare

nasīm-e-sub.h kā ek narm jhoñkā

jaise be-qarār dil ko chhū ke

paas hī Thahar jaa.e

rafta-rafta ruuh meñ utar jaa.e aur phir

pārīna guzargāhoñ par bhaTaktī māyūs rūhoñ ko

maazī ke ġhaar kī siyāhī tak mahdūd sab nigāhoñ ko

tā-hadd-e-nazar raushnī hī raushnī nazar aa.e

har nazar ummīd hī se pur nazar aa.e

ye nazm vo lamha hai jis dam

qāfile se dasht meñ bichhḌe musāfir ko

duur kahīñ duur magar kahīñ

ghane daraḳhtoñ ke us taraf

bichhḌe purāne dost kī mānind

ek kos mīnār dikh ga.ī ho

rāstoñ kī qaid se be-fikr bhī sākit bhī magar

har safar ko samt aur ummīd jo 'atā kare

thake haare zehn ko ek aas kā sitārā de

pur-ābla paañv meñ na.ī tāzgī

qadmoñ meñ ek puḳhtagī paidā kare

fariyād nahīñ hai ye ek pukār hai

faqīr kī sadā nahīñ

bhagvān kī niyāz nahīñ

ek bas vā'da hai ye

ek 'azīm insān kā insān se

ek vā'da māñgā hai

ek 'azīm insān ne insān se

ek vā'da jis kā 'amal

insāniyat kī 'azmat kī sanad hogā

aurat ek tasawwur hai ek KHwab hai

rah rah ke apni samt khinchta hai jo

be-sud armanon mein nasl-e-adam ke

phir se ek ubaal jo tari kare

zamana-bhar ki pastiyon mein

ek KHalal paida kare

nasim-e-subh ka ek narm jhonka

jaise be-qarar dil ko chhu ke

pas hi Thahar jae

rafta-rafta ruh mein utar jae aur phir

parina guzargahon par bhaTakti mayus ruhon ko

mazi ke ghaar ki siyahi tak mahdud sab nigahon ko

ta-hadd-e-nazar raushni hi raushni nazar aae

har nazar ummid hi se pur nazar aae

ye nazm wo lamha hai jis dam

qafile se dasht mein bichhDe musafir ko

dur kahin dur magar kahin

ghane daraKHton ke us taraf

bichhDe purane dost ki manind

ek kos minar dikh gai ho

raston ki qaid se be-fikr bhi sakit bhi magar

har safar ko samt aur ummid jo 'ata kare

thake haare zehn ko ek aas ka sitara de

pur-abla panw mein nai tazgi

qadmon mein ek puKHtagi paida kare

fariyaad nahin hai ye ek pukar hai

faqir ki sada nahin

bhagwan ki niyaz nahin

ek bas wa'da hai ye

ek 'azim insan ka insan se

ek wa'da manga hai

ek 'azim insan ne insan se

ek wa'da jis ka 'amal

insaniyat ki 'azmat ki sanad hoga