wadi-e-nil

jamāl-e-marg-āfrīñ! ye shab merī zindagī hai

nichoḌ de is ke chand lamhoñ kī ishratoñ meñ

vo mai vo nashsha ki sāġhar-e-māh-e-visāl meñ hai

vo mai ki tere jamāl meñ hai

visāl meñ hai

visāl! terā visāl vo sho.ala-e-ajal hai

ki jis meñ jal kar ka.ī patiñge abad kī manzil ko pā chuke haiñ

abad kī manzil!

sehr kī pahlī kiran vo nāgan

ki mere siine se āḳhirī saañs ban ke palTegī aa mirī jaañ!

jamāl-e-marg-āfrīñ! ye shab merī zindagī hai

mere laboñ ne vo lab bhī chūme haiñ jin meñ marg-e-girāñ nahīñ thī

vo phuul se lab ki jin kī tahdār pattiyoñ meñ

tamāzat-e-bāda-e-vafā thī

mire javāñ-sāl bāzuoñ ne

dhaḌakte marmar kī un chaTānoñ se ras nichoḌā hai zindagī kā

jinheñ gumāñ thā ki mere pahlū meñ dam nikalnā hī zindagī hai

mire hī siine pe jāgtī haiñ abhī vo rāteñ

ki jin meñ ubhre haiñ āftāb-e-jamāl merī masarratoñ ke

vo āftāb-e-jamāl jo kal sahar kī pahlī kiran ke Dasne se

mere ham-rāh jal bujheñge

tire tabassum kī lau ubhartī hī jā rahī hai

tujhe nazar aa rahī hai shāyad vo ziist jo laash ban ke taḌpegī

kal sahar ko

magar maiñ kuchh aur dekhtā huuñ

agar maiñ ye shab guzār detā gurisna sheroñ ke jañgaloñ meñ

jahāñ har ik lahza maut muñh phaaḌ kar jhapaTtī hai

bebasī par

agar maiñ ye shab guzār detā kisī samundar ke sard siine kī dhoñknī par

jahāñ har ek lahza maut muñh phaaḌ kar jhapaTtī hai

bebasī par

agar maiñ ye shab guzār detā kisī ġham-e-marg-āfrīñ meñ

ki jis ke changul meñ lahza lahza lahū Tapaktā hai aarzū kā

ajab na thā aaj shab agar merā koī dushman

mire badan se ye nok-e-ḳhanjar nikāl detā vo ḳhuuñ jo ab merī zindagī hai

jo ab tire paikar-e-masarrat kī vādiyoñ meñ

mirī haqīqat kā rāz-dāñ hai

qubūl hai mujh ko aaj kī shab sahar hai jis kī abad kī manzil

jamāl-e-marg āfrīñ ye shab merī zindagī hai

mirā muqaddar ki aaj kī shab hai mujh ko hāsil ye terā paikar

mirā muqaddar ki maiñ ne ḳhud maut ko pukārā hai terī ḳhātir

mirā muqaddar ki maiñ huuñ vo maut kā musāfir

jo apnī manzil pe aa gayā hai tire shabistāñ meñ ḳhud Thahar kar

tire laboñ se hayāt pā kar

tire jamāl-e-hayāt-parvar se lau lagā kar

tirī nigāhoñ kī gahrī jhīloñ meñ tair kar, mish.aleñ jalā kar

gudāz paikar kī reshmī chilmaneñ uThā kar

dhaḌakte dil meñ tarāne bo kar zamāne lā kar

azal abad ko sameT kar, be-karāñ banā kar

tire badan kī latāfatoñ meñ masarrat-e-zindagī milā kar

tire lahū meñ sharāre bhar kar harārat-e-jāvedāñ basā kar

tire ḳhumistān-e-dilbarī ko jahāñ meñ ik dāstāñ banā kar

tujhe ajal se qarīb lā kar

haqīqat-e-zindagī dikhā kar

ki maiñ huuñ vo maut kā musāfir

tire shabistāñ ke chor darvāze se guzar kar

jo apnī manzil pe aa gayā hai

vo log jo ro rahe haiñ mujh ko

ki maiñ ne ḳhud maut ko pukārā hai terī ḳhātir

vo log kyā jāneñ zindagī ko

unheñ ḳhabar kyā ki maut har lahza un kī hastī ko khā rahī hai

unheñ ḳhabar kyā ki zindagī kyā hai maiñ samajhtā huuñ zindagī ko

ki aaj kī shab ye zindagī merī zindagī hai

ye zindagī hai mirī jise maiñ ne aaj kī shab

tire masarrat-kade meñ lā kar

abad se ham-dosh kar diyā hai

ajal ko ḳhāmosh kar diyā hai

thirak rahā hai tirā badan lazzat-e-tarab se

chamak rahī haiñ tirī nigāheñ ḳhumār-e-shab se

uchak uchak kar sahar mujhe dekhne lagī hai

sahar kā thā intizār kab se

jamal-e-marg-afrin! ye shab meri zindagi hai

nichoD de is ke chand lamhon ki ishraton mein

wo mai wo nashsha ki saghar-e-mah-e-visal mein hai

wo mai ki tere jamal mein hai

visal mein hai

visal! tera visal wo shoala-e-ajal hai

ki jis mein jal kar kai patinge abad ki manzil ko pa chuke hain

abad ki manzil!

sehr ki pahli kiran wo nagan

ki mere sine se aaKHiri sans ban ke palTegi aa meri jaan!

jamal-e-marg-afrin! ye shab meri zindagi hai

mere labon ne wo lab bhi chume hain jin mein marg-e-giran nahin thi

wo phul se lab ki jin ki tahdar pattiyon mein

tamazat-e-baada-e-wafa thi

mere jawan-sal bazuon ne

dhaDakte marmar ki un chaTanon se ras nichoDa hai zindagi ka

jinhen guman tha ki mere pahlu mein dam nikalna hi zindagi hai

mere hi sine pe jagti hain abhi wo raaten

ki jin mein ubhre hain aaftab-e-jamal meri masarraton ke

wo aaftab-e-jamal jo kal sahar ki pahli kiran ke Dasne se

mere ham-rah jal bujhenge

tere tabassum ki lau ubharti hi ja rahi hai

tujhe nazar aa rahi hai shayad wo zist jo lash ban ke taDpegi

kal sahar ko

magar main kuchh aur dekhta hun

agar main ye shab guzar deta gurisna sheron ke jangalon mein

jahan har ek lahza maut munh phaD kar jhapaTti hai

bebasi par

agar main ye shab guzar deta kisi samundar ke sard sine ki dhonkni par

jahan har ek lahza maut munh phaD kar jhapaTti hai

bebasi par

agar main ye shab guzar deta kisi gham-e-marg-afrin mein

ki jis ke changul mein lahza lahza lahu Tapakta hai aarzu ka

ajab na tha aaj shab agar mera koi dushman

mere badan se ye nok-e-KHanjar nikal deta wo KHun jo ab meri zindagi hai

jo ab tere paikar-e-masarrat ki wadiyon mein

meri haqiqat ka raaz-dan hai

qubul hai mujh ko aaj ki shab sahar hai jis ki abad ki manzil

jamal-e-marg aafrin ye shab meri zindagi hai

mera muqaddar ki aaj ki shab hai mujh ko hasil ye tera paikar

mera muqaddar ki main ne KHud maut ko pukara hai teri KHatir

mera muqaddar ki main hun wo maut ka musafir

jo apni manzil pe aa gaya hai tere shabistan mein KHud Thahar kar

tere labon se hayat pa kar

tere jamal-e-hayat-parwar se lau laga kar

teri nigahon ki gahri jhilon mein tair kar, mishalen jala kar

gudaz paikar ki reshmi chilmanen uTha kar

dhaDakte dil mein tarane bo kar zamane la kar

azal abad ko sameT kar, be-karan bana kar

tere badan ki latafaton mein masarrat-e-zindagi mila kar

tere lahu mein sharare bhar kar hararat-e-jawedan basa kar

tere KHumistan-e-dilbari ko jahan mein ek dastan bana kar

tujhe ajal se qarib la kar

haqiqat-e-zindagi dikha kar

ki main hun wo maut ka musafir

tere shabistan ke chor darwaze se guzar kar

jo apni manzil pe aa gaya hai

wo log jo ro rahe hain mujh ko

ki main ne KHud maut ko pukara hai teri KHatir

wo log kya jaanen zindagi ko

unhen KHabar kya ki maut har lahza un ki hasti ko kha rahi hai

unhen KHabar kya ki zindagi kya hai main samajhta hun zindagi ko

ki aaj ki shab ye zindagi meri zindagi hai

ye zindagi hai meri jise main ne aaj ki shab

tere masarrat-kade mein la kar

abad se ham-dosh kar diya hai

ajal ko KHamosh kar diya hai

thirak raha hai tera badan lazzat-e-tarab se

chamak rahi hain teri nigahen KHumar-e-shab se

uchak uchak kar sahar mujhe dekhne lagi hai

sahar ka tha intizar kab se