wajib-ul-qatl

māh-e-kāmil hairat kī tasvīr ho jaise

hadd-e-chāh-e-naḳhshab ālamgīr ho jaise

holī ke rañgoñ kā dhoka

chehroñ par tahrīr ho jaise

bhīgī raat meñ āb-e-shar-añgez ke maare

mast sitāre

apnī chāleñ chuuk rahe haiñ

dahlīzoñ par pighlī sham.eñ

niile bādal ke parde meñ ojhal hote

aañkh ke taare DhūñD rahī haiñ

ā.īnoñ se nālāñ naqsh se aarī chehre

jazboñ ke uqdoñ meñ uljhe

mūrtiyoñ kī maalā japte

kaan meñ halqe Daale

gerve bādal pahne naach rahe haiñ

laal tilak meñ aañkh ugaa.e

sham.eñ thāme chob uThā.e

yak-rañgī dastāreñ jubbe gumbad oḌhe

sadiyoñ kī dīvār pe rote

raqs-e-vahshat kā zahrāb uñDel rahe haiñ

nā-bīnā.ī ke paiġhambar

rañg rachātī

maut kī bolī bol rahe haiñ

chīḳh rahe haiñ

in ke pairāhan ko dekho

chehre dekho āñkheñ dekho

dekho sab hāthoñ ko dekho

jis par rañg nazar aa jaa.e

jaan se jaa.e

lekin in ko kaun batā.e

sab ke haath rañge haiñ

sab ke dāman tar haiñ

āñkheñ ḳhūnīñ haiñ chehroñ par ḳhauf likhā hai

lekin be-nūrī meñ

sab tahrīreñ āñkhoñ se ojhal haiñ

rāh-e-adam par naqsh qadam ke DhūñDne vaalā

sāyoñ kī bohtāt meñ sahmā

dahshat kī har taal pe raqsāñ

soch rahā hai

vaqt ke pairoñ ko daldal se kaun nikāle

shab kī oT se jaltā sūraj

apne sar par kaun uThā.e

rañgoñ kī bauchhār meñ jaane

kis chehre par

kis ko rañg nazar aa jaa.e

dev kā saaya agle pal kis ko khā jaa.e

kyā ma.alūm

ki apnī baarī kab aa jaa.e

mah-e-kaamil hairat ki taswir ho jaise

hadd-e-chah-e-naKHshab aalamgir ho jaise

holi ke rangon ka dhoka

chehron par tahrir ho jaise

bhigi raat mein aab-e-shar-angez ke mare

mast sitare

apni chaalen chuk rahe hain

dahlizon par pighli shamen

nile baadal ke parde mein ojhal hote

aankh ke tare DhunD rahi hain

aainon se nalan naqsh se aari chehre

jazbon ke uqdon mein uljhe

murtiyon ki mala japte

kan mein halqe Dale

gerwe baadal pahne nach rahe hain

lal tilak mein aankh ugae

shamen thame chob uThae

yak-rangi dastaren jubbe gumbad oDhe

sadiyon ki diwar pe rote

raqs-e-wahshat ka zahrab unDel rahe hain

na-binai ke paighambar

rang rachati

maut ki boli bol rahe hain

chiKH rahe hain

in ke pairahan ko dekho

chehre dekho aankhen dekho

dekho sab hathon ko dekho

jis par rang nazar aa jae

jaan se jae

lekin in ko kaun batae

sab ke hath range hain

sab ke daman tar hain

aankhen KHunin hain chehron par KHauf likha hai

lekin be-nuri mein

sab tahriren aankhon se ojhal hain

rah-e-adam par naqsh qadam ke DhunDne wala

sayon ki bohtat mein sahma

dahshat ki har tal pe raqsan

soch raha hai

waqt ke pairon ko daldal se kaun nikale

shab ki oT se jalta suraj

apne sar par kaun uThae

rangon ki bauchhaar mein jaane

kis chehre par

kis ko rang nazar aa jae

dew ka saya agle pal kis ko kha jae

kya malum

ki apni bari kab aa jae