wapsi

aziyyat aur is sukūñ

donoñ ko hī dil khol ke maiñ ne luTāyā hai

hazāroñ baar aisā bhī huā hai

dostoñ kī rahnumā.ī meñ

phirā huuñ maarā maarā

shahr kī ābād saḌkoñ par

kabhī vīrān galiyoñ meñ

kabhī sahrāoñ kī bhī ḳhaak chhānī hai

magar is baar jaane kyā huā mujh ko

numā.ish kī dukānoñ meñ

sajā kar ḳhud ko ghar vāpas chalā aayā

abhī darvāza maiñ ne khaTkhaTāyā thā

ki ghar vāloñ ne kīna-tūz nazroñ se mujhe dekhā

jab un kī āñkhoñ meñ,

koī ramaq pahchān kī maiñ ne nahīñ paa.ī

to ulTe pairoñ vāpas lauT aayā huuñ

aur ab ye sochtā huuñ

dostoñ kī rahnumā.ī meñ

unhīñ galiyoñ meñ sahrāoñ meñ jā kar

apne qadmoñ ke nishāñ DhūñDūñ

aziyyat aur is sukun

donon ko hi dil khol ke main ne luTaya hai

hazaron bar aisa bhi hua hai

doston ki rahnumai mein

phira hun mara mara

shahr ki aabaad saDkon par

kabhi viran galiyon mein

kabhi sahraon ki bhi KHak chhani hai

magar is bar jaane kya hua mujh ko

numaish ki dukanon mein

saja kar KHud ko ghar wapas chala aaya

abhi darwaza main ne khaTkhaTaya tha

ki ghar walon ne kina-tuz nazron se mujhe dekha

jab un ki aankhon mein,

koi ramaq pahchan ki main ne nahin pai

to ulTe pairon wapas lauT aaya hun

aur ab ye sochta hun

doston ki rahnumai mein

unhin galiyon mein sahraon mein ja kar

apne qadmon ke nishan DhunDun