wapsi

maiñ ne sochā tumheñ muddat se nahīñ dekhā hai

dil bahut din se hai bechain chalūñ ghar ho aa.uuñ

duur se ghar nazar aayā raushan

saarī bastī meñ milā ek mirā ghar be-ḳhvāb

paas pahuñchā to vo dekhā jo nigāhoñ meñ mirī ghuum rahā hai ab tak

raushan kamre ke andar!

aur dahlīz pe tum!

sun ke shāyad mirī chaap

tum nikal aa.ī thiiñ bijlī kī tarah

aur vahīñ ruk sī ga.ī thīñ!

der tak!

paañv dahlīz pe chaukhaT pe rakhe donoñ haath

baal bikhrā.e hue shānoñ par

raushnī pusht pe haale kī tarah

saañs kī āmad-o-shud thī na koī jumbish-e-jism

jaise tasvīr lagī ho

jaise aasan pe khaḌī ho devī

maiñ ne sochā abhī tum ne mujhe pahchānā nahīñ

bas isī soch meñ le kar tumheñ andar aayā

paas biThlā ke kiyā yūñhī kisī baat kā zikr

tum ne bāteñ to bahut kiiñ magar un bātoñ meñ

koī vābastagi-e-dil

koī mānūs ishāra

lab pe iz.hār-e-ḳhushī

na koī ġham kī lakīr

are kuchh bhī to na thā

na vo hañsnā, na vo ronā, na shikāyat, na gila

na vo raġhbat kī koī chiiz pakāne kā ḳhayāl

na darī lā ke bichhānā na vo āñgan kī lipā.ī kī koī baat

na nigāhoñ meñ ye ehsās ki ham tum donoñ

haiñ koī biis baras se ik saath

laakh koshish pe bhī tum ne mujhe pahchānā nahīñ

maiñ ne jaanā tumheñ maiñ ne bhī nahīñ pahchānā

ek ishāre meñ zamāna hī badal jaatā hai

silsila uns o rifāqat kā koī aaj bhī hai

par ye hai aur koī

jis se bāñdhā hai nayā rishta-e-zīst

maiñ bhī huuñ aur koii, jis ke saath

tum bhī hañs-bol ke rah letī ho

vo bhī thī aur koī

jo vahīñ ruk ga.ī us chaukhaT par

jaise tasvīr lagī ho

jaise aasan pe khaḌī ho devī

main ne socha tumhein muddat se nahin dekha hai

dil bahut din se hai bechain chalun ghar ho aaun

dur se ghar nazar aaya raushan

sari basti mein mila ek mera ghar be-KHwab

pas pahuncha to wo dekha jo nigahon mein meri ghum raha hai ab tak

raushan kamre ke andar!

aur dahliz pe tum!

sun ke shayad meri chap

tum nikal aai thin bijli ki tarah

aur wahin ruk si gai thin!

der tak!

panw dahliz pe chaukhaT pe rakhe donon hath

baal bikhrae hue shanon par

raushni pusht pe haale ki tarah

sans ki aamad-o-shud thi na koi jumbish-e-jism

jaise taswir lagi ho

jaise aasan pe khaDi ho dewi

main ne socha abhi tum ne mujhe pahchana nahin

bas isi soch mein le kar tumhein andar aaya

pas biThla ke kiya yunhi kisi baat ka zikr

tum ne baaten to bahut kin magar un baaton mein

koi wabastagi-e-dil

koi manus ishaara

lab pe izhaar-e-KHushi

na koi gham ki lakir

are kuchh bhi to na tha

na wo hansna, na wo rona, na shikayat, na gila

na wo raghbat ki koi chiz pakane ka KHayal

na dari la ke bichhana na wo aangan ki lipai ki koi baat

na nigahon mein ye ehsas ki hum tum donon

hain koi bis baras se ek sath

lakh koshish pe bhi tum ne mujhe pahchana nahin

main ne jaana tumhein main ne bhi nahin pahchana

ek ishaare mein zamana hi badal jata hai

silsila uns o rifaqat ka koi aaj bhi hai

par ye hai aur koi

jis se bandha hai naya rishta-e-zist

main bhi hun aur koi, jis ke sath

tum bhi hans-bol ke rah leti ho

wo bhi thi aur koi

jo wahin ruk gai us chaukhaT par

jaise taswir lagi ho

jaise aasan pe khaDi ho dewi