wapsi mumkin nahin

aziim qātil ga.e zamānoñ ke maḳhfī auhām ke shikanjoñ meñ

sāda-lauhī ke sikka sikka bikā.ū gāhak

sisaktī ḳhilqat lahū meñ lat-pat

uqābī panjoñ meñ ābrūeñ taḌap rahī haiñ

sazā ke mehvar se TuuT girnā

shadīd mushkil

ga.e yagānoñ ke jubbe ab tak lahū meñ tar haiñ

shanās-nāme gale meñ laTkā.e phirne vaale

talāsh-e-zar meñ

badan ghumātī havā ke jhakkaḌ se girne vaale

musāfiroñ ke qadam

gadā.ī ke ḳhārzāroñ meñ

zaḳhm-ḳhurda

shikam-siparda

ġhalīz saa.il

ga.e savāroñ kī baḳhshishoñ se

hatheliyoñ pe larazte kaase

musībatoñ kī kasīf ḳhairāt se

labālab bhare hue haiñ

har ek jānib hamāre kūchoñ meñ

haDDiyoñ se bane makānoñ ke bām-o-dar munhadim

fasīloñ pe dūrbīneñ liye

muqābil

ga.e shikāroñ se utre

majbūriyoñ ke aajar

la.iim saudāgaroñ ke Tole

hamāre malboñ ke bār-dāne havas ke bāToñ se tolte haiñ

hamārī khāloñ kā ḳhasta resham gadhoñ pe laade

amiir ḳhittoñ meñ bechte haiñ

malūl bastī meñ uryāñ lāsheñ

girī hai jin pe azaab ohdoñ kī

bhārī sil

ga.e Thikānoñ pe ulluoñ ke udaas maskan

kabūtaroñ ke vo aalne haiñ ki jin meñ sannāTe bolte haiñ

saudāgaro āfiyat ke parcham khule

shikāre palaT bhī aa.e

magar ye socho ki mauj dar mauj tangnāoñ meñ

koh-paikar javār-bhāTe

musāfirat meñ tamām ghāTe

zalīl ghāyal

ga.e musāfir ki jin ke thailoñ meñ zar bañdhā thā

tahoñ kī qabroñ meñ jā chhupe haiñ

lahīm whaloñ ne un ke jismoñ ko noch Daalā

azim qatil gae zamanon ke maKHfi auham ke shikanjon mein

sada-lauhi ke sikka sikka bikau gahak

sisakti KHilqat lahu mein lat-pat

uqabi panjon mein aabruen taDap rahi hain

saza ke mehwar se TuT girna

shadid mushkil

gae yaganon ke jubbe ab tak lahu mein tar hain

shanas-name gale mein laTkae phirne wale

talash-e-zar mein

badan ghumati hawa ke jhakkaD se girne wale

musafiron ke qadam

gadai ke KHarzaron mein

zaKHm-KHurda

shikam-siparda

ghaliz sail

gae sawaron ki baKHshishon se

hatheliyon pe larazte kase

musibaton ki kasif KHairaat se

labaalab bhare hue hain

har ek jaanib hamare kuchon mein

haDDiyon se bane makanon ke baam-o-dar munhadim

fasilon pe durbinen liye

muqabil

gae shikaron se utre

majburiyon ke aajar

laim saudagaron ke Tole

hamare malbon ke bar-dane hawas ke baTon se tolte hain

hamari khaalon ka KHasta resham gadhon pe lade

amir KHitton mein bechte hain

malul basti mein uryan lashen

giri hai jin pe azab ohdon ki

bhaari sil

gae Thikanon pe ulluon ke udas maskan

kabutaron ke wo aalne hain ki jin mein sannaTe bolte hain

saudagaro aafiyat ke parcham khule

shikare palaT bhi aae

magar ye socho ki mauj dar mauj tangnaon mein

koh-paikar jawar-bhaTe

musafirat mein tamam ghaTe

zalil ghayal

gae musafir ki jin ke thailon mein zar bandha tha

tahon ki qabron mein ja chhupe hain

lahim whalon ne un ke jismon ko noch Dala