wardat

dil-e-hazīñ meñ abhī yād-e-yār baaqī hai

ḳhizāñ-rasīda chaman meñ bahār baaqī hai

nishān-e-hastī-e-nā-pā.edār baaqī hai

kisī kā naam kisī kā mazār baaqī hai

hazār karvaTeñ badlīñ zamāne ne ab tak

magar abhī vahī lail-o-nahār baaqī hai

bahār phirtī hai āñkhoñ meñ bazm-e-sāqī kī

surūr-e-rafta kā ab tak ḳhumār baaqī hai

shakeb-o-sabr mohabbat meñ kho chukā jab se

jigar meñ taab na dil meñ qarār baaqī hai

rahā na hashr meñ rahmat se koī bhī mahrūm

mire gunāhoñ kā phir bhī shumār baaqī hai

jo khiñch ke naza.a meñ dam aa gayā hai ashkoñ meñ

dam-e-vidā.a tirā intizār baaqī hai

sukūn-e-marg na aa tū abhī ḳhudā ke liye

ki dil meñ tāb-e-ġham-e-rozgār baaqī hai

milā ke ḳhaak meñ 'mehdī' ko kyā milegā tujhe

tirī jafā kī jo ik yādgār baaqī hai

dil-e-hazin mein abhi yaad-e-yar baqi hai

KHizan-rasida chaman mein bahaar baqi hai

nishan-e-hasti-e-na-paedar baqi hai

kisi ka nam kisi ka mazar baqi hai

hazar karwaTen badlin zamane ne ab tak

magar abhi wahi lail-o-nahaar baqi hai

bahaar phirti hai aankhon mein bazm-e-saqi ki

surur-e-rafta ka ab tak KHumar baqi hai

shakeb-o-sabr mohabbat mein kho chuka jab se

jigar mein tab na dil mein qarar baqi hai

raha na hashr mein rahmat se koi bhi mahrum

mere gunahon ka phir bhi shumar baqi hai

jo khinch ke naza mein dam aa gaya hai ashkon mein

dam-e-widaa tera intizar baqi hai

sukun-e-marg na aa tu abhi KHuda ke liye

ki dil mein tab-e-gham-e-rozgar baqi hai

mila ke KHak mein 'mehdi' ko kya milega tujhe

teri jafa ki jo ek yaadgar baqi hai