waris

vo abnormal nahīñ thā

sirf us ko normal banñe kī hasrat thī

ka.ī ḳhānoñ meñ us kī zindagī baTne lagī thī

vo apnī koshish-e-nā-mo'tabar se tañg aa kar

nīm-jāñ ho kar

ek ḳhāne meñ panah lene lagā thā

banī āmāt-gāh-e-tīr-e-nafrat shaḳhsiyat us kī

use bhī ḳhud se nafrat ho chukī thī

magar is nafrat-e-mānūs kī takrār se us ne

durusht o nā-muvāfiq zindagī se sulh kar lī thī

yahī thā kīsa-e-aḳhlāq us kā

ġharībī ne sharāfat chhīn lī thī

aur us kī shaḳhsiyat ke pairahan meñ

guhar-bāroñ ke badle sañg-reze jaḌ diye the

vo abnormal nahīñ thā

magar ab us meñ ḳhud ko normal karne kā yaarā bhī nahīñ thā

use ab ye gavārā bhī nahīñ thā

galī-kūchoñ kī saarī gandagī kā

tīrgī kā

vo ab haqdār vāris ban chukā thā

wo abnormal nahin tha

sirf us ko normal banne ki hasrat thi

kai KHanon mein us ki zindagi baTne lagi thi

wo apni koshish-e-na-mo'tabar se tang aa kar

nim-jaan ho kar

ek KHane mein panah lene laga tha

bani aamat-gah-e-tir-e-nafrat shaKHsiyat us ki

use bhi KHud se nafrat ho chuki thi

magar is nafrat-e-manus ki takrar se us ne

durusht o na-muwafiq zindagi se sulh kar li thi

yahi tha kisa-e-aKHlaq us ka

gharibi ne sharafat chhin li thi

aur us ki shaKHsiyat ke pairahan mein

guhar-baron ke badle sang-reze jaD diye the

wo abnormal nahin tha

magar ab us mein KHud ko normal karne ka yara bhi nahin tha

use ab ye gawara bhi nahin tha

gali-kuchon ki sari gandagi ka

tirgi ka

wo ab haqdar waris ban chuka tha