wahshaten

vahshateñ udham machātī haiñ

vo jab chāhtī haiñ hameñ halkān karne aa jaatī haiñ

kabhī darvāzoñ se kabhī khiḌkiyoñ se

kabhī raushan-dān kī us raushnī se

jin se hamāre bachche kabhī khelte the

hamesha afsurdagī kī chādar ham yuuñ bhī oḌhe rahte haiñ

aur muñh chhupā.e paḌe rahte haiñ

kahīñ koī na.ī vārdāt hamārī taak meñ na ho

kahīñ koī zabān ham ko Das na le

lekin agar ham bach bhī jaa.eñ to kyā

ye vahshateñ raat aur din

kabhī lafzoñ meñ chhup kar andhā-dhuñd ham par vaar kartī haiñ

kabhī apne saath jamghaToñ meñ nafrat kī koī na.ī qism kī

zahrīlī gas ban kar ham par chhoḌtī haiñ

un kā puurā irāda hai

ham maut ke muñh meñ chale jaa.eñ

bahut dinoñ ba.ad ham ne in vahshatoñ ko daryāft kiyā hai

ye kyoñ haiñ aur kyā chāhtī haiñ

an-ginat nāmoñ ke saath ye hamāre badan ko khurachtī haiñ

an-ginat lafzoñ kī kulhāḌiyoñ se ye hamāre sar ko nishāna banātī haiñ

aur ham haiñ ki dam sādhe āñkheñ mūñde

un ke irādoñ ko paspā karne kī aas meñ paḌe rahte haiñ

ye vahshateñ aksar hamāre badan ke kisī hisse meñ dāḳhil ho kar

hameñ Darāvne ḳhvāb dikhātī haiñ

bachāo kī koī sūrat na pā kar

ham tanhā.ī kī us khurdurī saḌak par nikal jaate haiñ

jahāñ ham dilāsā dete haiñ ḳhud ko

chalo aaj to ham bach ga.e

duur ek kamre meñ

bichhe hue ek bistar par

takiye par sar rakh ke so ga.ī thī

ḳhvāb dekhtī huuñ

dūr-darāz jaanī pahchānī sī saḌkeñ haiñ

jaane pahchāne log

khule hue haiñ bāzār

peḌ jhuum rahe haiñ havā ke hāthoñ

maiñ ne dekhā vahāñ to ajab sā haal hai

sach in peḌoñ kī TuuTī shāḳhoñ meñ uuñgh rahā hai

jhuuT uchhal kuud meñ lagā huā hai

maiñ ne jaanā

sach ko jhuuT ne be-hoshī kā Tiika lagā diyā ho

jabhī to phudak rahā hai

be-sharmī se

kyā hai bas

rel-pel hai bedardī kī

pāltū kutte bhauñk rahe haiñ

bhūke bachche saḌak pe kuuḌe ke Dher se khānā DhūñDh rahe haiñ

niiñd TuuT ga.ī

merī āñkheñ ek lambe safar ke baad bhī

nahīñ bhūlīñ

Darāvne ḳhvāb dekhnā

mere kamre ke bistar se le kar

us bistar tak

jo merā nahīñ hai

wahshaten udham machati hain

wo jab chahti hain hamein halkan karne aa jati hain

kabhi darwazon se kabhi khiDkiyon se

kabhi raushan-dan ki us raushni se

jin se hamare bachche kabhi khelte the

hamesha afsurdagi ki chadar hum yun bhi oDhe rahte hain

aur munh chhupae paDe rahte hain

kahin koi nai wardat hamari tak mein na ho

kahin koi zaban hum ko Das na le

lekin agar hum bach bhi jaen to kya

ye wahshaten raat aur din

kabhi lafzon mein chhup kar andha-dhund hum par war karti hain

kabhi apne sath jamghaTon mein nafrat ki koi nai qism ki

zahrili gas ban kar hum par chhoDti hain

un ka pura irada hai

hum maut ke munh mein chale jaen

bahut dinon baad hum ne in wahshaton ko daryaft kiya hai

ye kyon hain aur kya chahti hain

an-ginat namon ke sath ye hamare badan ko khurachti hain

an-ginat lafzon ki kulhaDiyon se ye hamare sar ko nishana banati hain

aur hum hain ki dam sadhe aankhen munde

un ke iradon ko paspa karne ki aas mein paDe rahte hain

ye wahshaten aksar hamare badan ke kisi hisse mein daKHil ho kar

hamein Darawne KHwab dikhati hain

bachao ki koi surat na pa kar

hum tanhai ki us khurduri saDak par nikal jate hain

jahan hum dilasa dete hain KHud ko

chalo aaj to hum bach gae

dur ek kamre mein

bichhe hue ek bistar par

takiye par sar rakh ke so gai thi

KHwab dekhti hun

dur-daraaz jaani pahchani si saDken hain

jaane pahchane log

khule hue hain bazar

peD jhum rahe hain hawa ke hathon

main ne dekha wahan to ajab sa haal hai

sach in peDon ki TuTi shaKHon mein ungh raha hai

jhuT uchhal kud mein laga hua hai

main ne jaana

sach ko jhuT ne be-hoshi ka Tika laga diya ho

jabhi to phudak raha hai

be-sharmi se

kya hai bas

rel-pel hai bedardi ki

paltu kutte bhaunk rahe hain

bhuke bachche saDak pe kuDe ke Dher se khana DhunDh rahe hain

nind TuT gai

meri aankhen ek lambe safar ke baad bhi

nahin bhulin

Darawne KHwab dekhna

mere kamre ke bistar se le kar

us bistar tak

jo mera nahin hai