wajud aur ibn-e-adam

1

ham kisī aur sitāre se yahāñ aa.e the

yaad rakhnā thī yahī baat magar bhuul ga.e

ham ne jab chāñd pe rakkhā thā qadam

yaad aayā thā hameñ us kā badan

ham magar apnoñ kī bātoñ meñ magan

vādī-e-yād kī gahrā.ī meñ utre hī nahīñ

kaash us lamhe kī āvāz ko ham sun lete

phir hameñ vaqt ke changul se rihā.ī hotī

ġhaar ke paar safedī na siyāhī hotī

2

zamīñ kā zamāna hai ye

ham zamīñ-bos hue

sabz rañgoñ ke sarāb

nīlgūñ sat.h-e-āb

ham falak-bos hue

aur ye bhuul ga.e

the kabhī apne badan par tere qadmoñ ke nishāñ

sabz pattoñ ke sivā

aur bhī rang the rangoñ se sivā

kaun sā kaif thā in chīzoñ meñ

jin kī tum ruuh the ham paikar the

nuur ho saaya ho ki tārīkī ho

laakh maiñ jism se aur ruuh se ārāsta pairāsta ho kar uTThūñ

ban bhī jaa.e ye zamīñ

merī karishma-gah-e-ālāt-garī

tū magar aur hī kuchh chiiz hai

tū na nuurī hai na naarī hai na ḳhāk-e-ābī

tū na shamsī hai na arzī hai na hai mahtābī

tū na mirrīḳh se zohra se na sartān se hai

tere qadmoñ ke nishāñ aur kahīñ dekhe the

jism qad shakl ye atvār ye tevar tere

terī bū-bās libās phuul ye zevar tere

ḳhāmushī terī ye āvāz ye chalnā terā aanā jaanā

ye sitāroñ kā ġhubār

silsila hai ye adāoñ kā

ki hai jism ke pardoñ pe terī ruuh ke naġhmoñ kā ḳhumār

ik na.ī shaan kā har roz nikhār

aur phir sochtā huuñ

tū to kuchh aur hai in chīzoñ kā majmūa nahīñ

tū to kuchh aur hai in se bhī sivā

in ke hone kā na hone kā bhī pāband nahīñ terā vajūd

tere qadmoñ ke nishāñ aur kahīñ dekhe the

tere qadmoñ se to hai aaj bhī shādāb mirā saarā vajūd

yaad rakhne kī yahī baat thī ibn-e-ādam

tum ne jab chāñd pe rakkhā thā qadam

tum kisī aur sitāre se yahāñ aa.e the

1

hum kisi aur sitare se yahan aae the

yaad rakhna thi yahi baat magar bhul gae

hum ne jab chand pe rakkha tha qadam

yaad aaya tha hamein us ka badan

hum magar apnon ki baaton mein magan

wadi-e-yaad ki gahrai mein utre hi nahin

kash us lamhe ki aawaz ko hum sun lete

phir hamein waqt ke changul se rihai hoti

ghaar ke par safedi na siyahi hoti

2

zamin ka zamana hai ye

hum zamin-bos hue

sabz rangon ke sarab

nilgun sath-e-ab

hum falak-bos hue

aur ye bhul gae

the kabhi apne badan par tere qadmon ke nishan

sabz patton ke siwa

aur bhi rang the rangon se siwa

kaun sa kaif tha in chizon mein

jin ki tum ruh the hum paikar the

nur ho saya ho ki tariki ho

lakh main jism se aur ruh se aarasta pairasta ho kar uTThun

ban bhi jae ye zamin

meri karishma-gah-e-alat-gari

tu magar aur hi kuchh chiz hai

tu na nuri hai na nari hai na KHak-e-abi

tu na shamsi hai na arzi hai na hai mahtabi

tu na mirriKH se zohra se na sartan se hai

tere qadmon ke nishan aur kahin dekhe the

jism qad shakl ye atwar ye tewar tere

teri bu-bas libas phul ye zewar tere

KHamushi teri ye aawaz ye chalna tera aana jaana

ye sitaron ka ghubar

silsila hai ye adaon ka

ki hai jism ke pardon pe teri ruh ke naghmon ka KHumar

ek nai shan ka har roz nikhaar

aur phir sochta hun

tu to kuchh aur hai in chizon ka majmua nahin

tu to kuchh aur hai in se bhi siwa

in ke hone ka na hone ka bhi paband nahin tera wajud

tere qadmon ke nishan aur kahin dekhe the

tere qadmon se to hai aaj bhi shadab mera sara wajud

yaad rakhne ki yahi baat thi ibn-e-adam

tum ne jab chand pe rakkha tha qadam

tum kisi aur sitare se yahan aae the