waqt

sar-bar-āvurda sanobar kī ghanī shāḳhoñ meñ

chāñd billor kī TuuTī huī chūḌī kī tarah aTkā hai

dāman-e-koh kī ik bastī meñ

TimTimāte haiñ mazāroñ pe charāġh

āsmāñ surma.ī farġhul meñ sitāre Tāñke

simTā jaatā hai jhukā aatā hai

vaqt be-zār nazar aatā hai

sar-bar-āvurda sanobar kī ghanī shāḳhoñ meñ

sub.h kī nuqra.ī tanvīr rachī jaatī hai

dāman-e-koh meñ bikhre hue khet

lahlahāte haiñ to dhartī ke tanaffus kī sadā aatī hai

āsmāñ kitnī bulandī pe hai aur kitnā aziim

na.e sūraj kī shuāoñ kā musaffā āñgan

vaqt bedār nazar aatā hai

sar-bar-āvurda sanobar kī ghanī shāḳhoñ meñ

āftāb ek alaao kī tarah raushan hai

dāman-e-koh meñ chalte hue hal

sīna-e-dahr pe insān ke jabrūt kī tārīḳh raqam karte haiñ

āsmāñ tez shuāoñ se hai is darja gudāz

jaise chhūne se pighal jā.egā

vaqt tayyār nazar aatā hai

sar-bar-āvurda sanobar kī ghanī shāḳhoñ meñ

zindagī kitne haqā.eq ko janam detī hai

dāman-e-koh meñ phaile hue maidānoñ par

zauq-e-taḳhlīq ne ejaaz dikhā.e haiñ lahū uglā hai

āsmāñ gardish-e-ayyām ke rele se hirāsāñ to nahīñ

ḳhair-maqdam ke bhī andāz huā karte haiñ

vaqt kī raah meñ moḌ aate haiñ manzil to nahīñ aa saktī

sar-bar-awurda sanobar ki ghani shaKHon mein

chand billor ki TuTi hui chuDi ki tarah aTka hai

daman-e-koh ki ek basti mein

TimTimate hain mazaron pe charagh

aasman surmai farghul mein sitare Tanke

simTa jata hai jhuka aata hai

waqt be-zar nazar aata hai

sar-bar-awurda sanobar ki ghani shaKHon mein

subh ki nuqrai tanwir rachi jati hai

daman-e-koh mein bikhre hue khet

lahlahate hain to dharti ke tanaffus ki sada aati hai

aasman kitni bulandi pe hai aur kitna azim

nae suraj ki shuaon ka musaffa aangan

waqt bedar nazar aata hai

sar-bar-awurda sanobar ki ghani shaKHon mein

aaftab ek alao ki tarah raushan hai

daman-e-koh mein chalte hue hal

sina-e-dahr pe insan ke jabrut ki tariKH raqam karte hain

aasman tez shuaon se hai is darja gudaz

jaise chhune se pighal jaega

waqt tayyar nazar aata hai

sar-bar-awurda sanobar ki ghani shaKHon mein

zindagi kitne haqaeq ko janam deti hai

daman-e-koh mein phaile hue maidanon par

zauq-e-taKHliq ne ejaz dikhae hain lahu ugla hai

aasman gardish-e-ayyam ke rele se hirasan to nahin

KHair-maqdam ke bhi andaz hua karte hain

waqt ki rah mein moD aate hain manzil to nahin aa sakti