waqt-e-murawwat

alassabāh ki thī kā.enāt sar-ba-sujūd

falak pe shor-e-azāñ thā zamīñ pe bāñg-e-durūd

bahār shabnam-āsūda thī ki rūh-e-ḳhalīl

faroġh-e-lāla-o-gul thā ki ātish-e-namrūd

jalā rahī thī havā bazm-e-jāñ meñ sham-e-tarab

miTā rahī thī sabā lauh-e-dil se naqsh-e-jumūd

guloñ ke rañg meñ thī shān-e-ḳhanda-e-yūsuf

kalī ke saaz meñ thā lutf-e-naġhma-e-dā.ūd

har ik jabīñ pe daraḳhshāñ thā nayyar-e-iqbāl

har ek farq pe tābāñ thā tāla-e-mas.ūd

fazā-e-charḳh meñ dauḌī huī thī rūh-e-zuhūr

bisāt-e-ḳhāk pe chhāyā huā thā rañg-e-numūd

hasīn ḳhvāb se chauñke the rasmasā.e hue

machal rahī thī havāoñ meñ bū-e-ambar-o-būd

ye rañg dekh kar aayā mujhe ḳhayāl-e-namāz

mirī namāz ki hai shāhid-o-sharāb-o-surūd

mirī namāz ki hai naġhma-e-huval-bāqī

mirī namāz ki hai nāra-e-huval-maujūd

mirī namāz ki hai ishq-e-nāzir-o-manzūr

mirī namāz ki hai hubb-e-shāhid-o-mash.hūd

mirī namāz ki hai ek sāz-e-lā-fānī

marī namāz ki hai ek soz-e-lā-mahdūd

mirī namāz ki hai diid rū-e-nā-shusta

mirī namāz ki hai tauf-e-husn-e-ḳhvāb-ālūd

mirī namāz ''nazar'' shaiḳh kī namāz ''alfāz''

yahāñ charāġh vahāñ sirf sham-e-kushta kā duud

yahāñ hai rishta-e-anfās meñ tarannum-e-dost

yahāñ latāfat-e-ehsās se ziyāñ hai na suud

fuġhāñ ki ''jumbish-e-a.azā'' vahāñ asās-e-namāz

ḳhoshā ki larzish-e-dil hai yahāñ qayām o qu.uud

kisī maqām pe hāsil nahīñ qarār mujhe

sahar ko huuñ jo barahman to shaam ko mahmūd

ġharaz ki aate hī vaqt-e-sahar ḳhayāl-e-namāz

jabīñ thī pā-e-sanam par zabāñ pe ''yā-ma.abūd!''

tamām rāz-e-nihāñ khul ga.e mire dil par

ze-takiya-gāh-e-adam tā-ba-kārgāh-e-vajūd

sar-e-niyāz se zāhir huā tabassum-e-nāz

butūn-e-ḳhāk se paidā huā dur-e-maqsūd

uThā ke phir sar-e-pur-shauq pā-e-jānāñ se

kahā ye maiñ ne ki ai sarv-e-bostān-e-vajūd

biyā biyā ki tirā tañg dar kanār kushem

ze-bosa-mehr-kunam bar-lab-e-shakar-ālūd

mire laboñ ko bhī de ruḳhsat-e-tarāna-e-hamd

har ek zarra hai is vaqt āshnā-e-durūd

ye sun ke sharm se koī javāb ban na paḌā

jhukī nigāh-e-jabīñ ho ga.ī araq-ālūd

hayā ne baḌh ke pukārā ye ''kāhisheñ be-kār''

nazar ne jhuk ke sadā dī ye ''kāvisheñ be-sūd''

''dahān-e-yār ki darmān-e-dard-e-'hāfiz' dāsht

fuġhāñ ki vaqt-e-muravvat che tañg hausla būd''

alassabah ki thi kaenat sar-ba-sujud

falak pe shor-e-azan tha zamin pe bang-e-durud

bahaar shabnam-asuda thi ki ruh-e-KHalil

farogh-e-lala-o-gul tha ki aatish-e-namrud

jala rahi thi hawa bazm-e-jaan mein sham-e-tarab

miTa rahi thi saba lauh-e-dil se naqsh-e-jumud

gulon ke rang mein thi shan-e-KHanda-e-yusuf

kali ke saz mein tha lutf-e-naghma-e-daud

har ek jabin pe daraKHshan tha nayyar-e-iqbaal

har ek farq pe taban tha tala-e-masud

faza-e-charKH mein dauDi hui thi ruh-e-zuhur

bisat-e-KHak pe chhaya hua tha rang-e-numud

hasin KHwab se chaunke the rasmasae hue

machal rahi thi hawaon mein bu-e-ambar-o-bud

ye rang dekh kar aaya mujhe KHayal-e-namaz

meri namaz ki hai shahid-o-sharab-o-surud

meri namaz ki hai naghma-e-huwal-baqi

meri namaz ki hai nara-e-huwal-maujud

meri namaz ki hai ishq-e-nazir-o-manzur

meri namaz ki hai hubb-e-shahid-o-mashhud

meri namaz ki hai ek saz-e-la-fani

mari namaz ki hai ek soz-e-la-mahdud

meri namaz ki hai did ru-e-na-shusta

meri namaz ki hai tauf-e-husn-e-KHwab-alud

meri namaz nazar shaiKH ki namaz alfaz

yahan charagh wahan sirf sham-e-kushta ka dud

yahan hai rishta-e-anfas mein tarannum-e-dost

yahan latafat-e-ehsas se ziyan hai na sud

fughan ki jumbish-e-aza wahan asas-e-namaz

KHosha ki larzish-e-dil hai yahan qayam o quud

kisi maqam pe hasil nahin qarar mujhe

sahar ko hun jo barahman to sham ko mahmud

gharaz ki aate hi waqt-e-sahar KHayal-e-namaz

jabin thi pa-e-sanam par zaban pe ya-mabud!

tamam raaz-e-nihan khul gae mere dil par

ze-takiya-gah-e-adam ta-ba-kargah-e-wajud

sar-e-niyaz se zahir hua tabassum-e-naz

butun-e-KHak se paida hua dur-e-maqsud

uTha ke phir sar-e-pur-shauq pa-e-jaanan se

kaha ye main ne ki ai sarw-e-bostan-e-wajud

biya biya ki tera tang dar kanar kushem

ze-bosa-mehr-kunam bar-lab-e-shakar-alud

mere labon ko bhi de ruKHsat-e-tarana-e-hamd

har ek zarra hai is waqt aashna-e-durud

ye sun ke sharm se koi jawab ban na paDa

jhuki nigah-e-jabin ho gai araq-alud

haya ne baDh ke pukara ye kahishen be-kar

nazar ne jhuk ke sada di ye kawishen be-sud

dahan-e-yar ki darman-e-dard-e-'hafiz' dasht

fughan ki waqt-e-murawwat che tang hausla bud