waqt ek kahani-kar

vaqt sab se baḌā kahānī-kār

jo azal se har chehre par

āfāqī kahāniyāñ likh kar

chehroñ ko lamha-ba-lamha dāstāñ karne meñ masrūf

ek kahānī kī takmīl ke liye

an-ginat kirdār āsmān se utarte haiñ

siyāh o safed sā.atoñ kī bārish meñ bhīgte kore chehroñ par

vaqt sazā jazā kī aisī lā-zavāl kahāniyāñ tahrīr kartā hai

ki kitne hī chehre kā.enāt ke ibrat-kade meñ

āvezāñ hote haiñ

aur kitne hī raushniyoñ ke isti.āre bante haiñ

vaqt ke paas

āsmān se utartī kahāniyoñ ke

an-ginat Dher lage paḌe haiñ

jinheñ likh kar use

chehroñ kī kitnī hī adhūrī kitābeñ mukammal karnī haiñ

waqt sab se baDa kahani-kar

jo azal se har chehre par

aafaqi kahaniyan likh kar

chehron ko lamha-ba-lamha dastan karne mein masruf

ek kahani ki takmil ke liye

an-ginat kirdar aasman se utarte hain

siyah o safed saaton ki barish mein bhigte kore chehron par

waqt saza jaza ki aisi la-zawal kahaniyan tahrir karta hai

ki kitne hi chehre kaenat ke ibrat-kade mein

aawezan hote hain

aur kitne hi raushniyon ke istiare bante hain

waqt ke pas

aasman se utarti kahaniyon ke

an-ginat Dher lage paDe hain

jinhen likh kar use

chehron ki kitni hi adhuri kitaben mukammal karni hain