waqt

har ik lamha jo mustaqbil thā maazī bantā jaatā hai

agar chāho to is lamhe ko umr-e-jāvedāñ samjho

use qaid-e-zamāñ meñ jalva-e-nūr-e-azal jaano

dam-e-jibrīl samjho yā matā.a-e-kun-fakāñ samjho

abad ke dasht meñ jo qatra-e-vaqt-e-ravāñ gum ho

use pahnā.iyoñ meñ ek bahr-e-be-karāñ samjho

kamāl-e-ḳhud-farebī se fanā ko bhī baqā jaano

aur apnī ḳhush-ḳhayālī se makāñ ko lā-makāñ samjho

makāñ qaid-e-zamāñ aur lā-makāñ jab lā-zamāñ Thahre

abad se munsalik phir vaqt kā sail-e-ravāñ kyoñ ho

agar taqdīm-e-insāñ kī haqīqat ek lamha hai

vo ik lamha kabhī juzv-e-hayāt-e-jāvedāñ kyoñ ho

vo lamha jo hai ik mauj-e-nafas se bhī faromāya

fareb-e-chashm hai ik ramz-e-taḳhlīq-e-jahāñ kyoñ ho

masāfat aur taharruk se huā paidā vo ik lamha

jo hai paimāna-e-imroz aur ganjīna-e-fardā

madār-e-arz par ik nuqta-e-sayyāl hai lamha

tilism-e-barq-e-larzāñ yā misāl-e-qatra-e-dariyā

sabāt aur be-sabātī meñ nahīñ rishta agar koī

tasavvur kyoñ ho baaqī vaqt-e-aslī aur izāfī kā

har ik lamha jo mustaqbil thā maazī bantā jaatā hai

jise sab haal kahte haiñ nahīñ koī vajūd us kā

har ek lamha jo mustaqbil tha mazi banta jata hai

agar chaho to is lamhe ko umr-e-jawedan samjho

use qaid-e-zaman mein jalwa-e-nur-e-azal jaano

dam-e-jibril samjho ya mataa-e-kun-fakan samjho

abad ke dasht mein jo qatra-e-waqt-e-rawan gum ho

use pahnaiyon mein ek bahr-e-be-karan samjho

kamal-e-KHud-farebi se fana ko bhi baqa jaano

aur apni KHush-KHayali se makan ko la-makan samjho

makan qaid-e-zaman aur la-makan jab la-zaman Thahre

abad se munsalik phir waqt ka sail-e-rawan kyon ho

agar taqdim-e-insan ki haqiqat ek lamha hai

wo ek lamha kabhi juzw-e-hayat-e-jawedan kyon ho

wo lamha jo hai ek mauj-e-nafas se bhi faromaya

fareb-e-chashm hai ek ramz-e-taKHliq-e-jahan kyon ho

masafat aur taharruk se hua paida wo ek lamha

jo hai paimana-e-imroz aur ganjina-e-farda

madar-e-arz par ek nuqta-e-sayyal hai lamha

tilism-e-barq-e-larzan ya misal-e-qatra-e-dariya

sabaat aur be-sabaati mein nahin rishta agar koi

tasawwur kyon ho baqi waqt-e-asli aur izafi ka

har ek lamha jo mustaqbil tha mazi banta jata hai

jise sab haal kahte hain nahin koi wajud us ka