waqt ka chiDiya-ghar

maiñ vaqt ke chiḌiyā-ghar

jānvaroñ ke jangaloñ meñ un kī

tamām-tar zarūratoñ ke saath dī ga.ī āzādī

aur tumhāre dil ke kone-khudroñ meñ

mere junūn ko dī ga.ī āzārī meñ

kuchh ziyāda farq nahīñ dekhtī

sadhāne ke liye intizāmiya kī yaumiya aur

hafta-vār mēting ke zarīye be-muhāba jānvaroñ ko

usūloñ ke mutābiq sadhāne kā bharpūr amal

natīja-ḳhez sābit ho rahā hai

magar mujhe e'tirāf hai ki jañgle ke andar merī

zarūratoñ kā puurā puurā ḳhayāl rakkhā jā rahā hai

merī ḳhūrāk aur paanī pābandī se muqarrara vaqt par

pahuñchā.ī jā rahī hai

salāḳhoñ ke andar kā puurā ilāqa merī dastaras meñ

de diyā gayā hai

magar tamāsh-bīnoñ ke rivāyatī shauq se pahuñchne vaalī

aziyyat se tahaffuz bhī diyā jā rahā hai

kholiyoñ meñ baqā-e-bāhamī ke zarrīñ usuul ke tahat

dūsre jangaloñ tak pahuñchne ke rāste bhī masdūd

kar diye ga.e haiñ

sabze kaa.ī pattharoñ aur tālāb ke zariye masnūī duniyā kī

bunat aisī zarūr hai

ki koī bhī us pe asl hone kā dhokā

khā saktā hai

so maiñ bhī apne aap ko is ḳhūbsūrat māhaul

kā aadī banāne kī mukammal koshish kar rahī huuñ

main waqt ke chiDiya-ghar

jaanwaron ke jangalon mein un ki

tamam-tar zaruraton ke sath di gai aazadi

aur tumhaare dil ke kone-khudron mein

mere junun ko di gai aazari mein

kuchh ziyaada farq nahin dekhti

sadhane ke liye intizamiya ki yaumiya aur

hafta-war meeting ke zariye be-muhaba jaanwaron ko

usulon ke mutabiq sadhane ka bharpur amal

natija-KHez sabit ho raha hai

magar mujhe e'tiraf hai ki jangle ke andar meri

zaruraton ka pura pura KHayal rakkha ja raha hai

meri KHurak aur pani pabandi se muqarrara waqt par

pahunchai ja rahi hai

salaKHon ke andar ka pura ilaqa meri dastaras mein

de diya gaya hai

magar tamash-binon ke riwayati shauq se pahunchne wali

aziyyat se tahaffuz bhi diya ja raha hai

kholiyon mein baqa-e-bahami ke zarrin usul ke tahat

dusre jangalon tak pahunchne ke raste bhi masdud

kar diye gae hain

sabze kai pattharon aur talab ke zariye masnui duniya ki

bunat aisi zarur hai

ki koi bhi us pe asl hone ka dhoka

kha sakta hai

so main bhi apne aap ko is KHubsurat mahaul

ka aadi banane ki mukammal koshish kar rahi hun