waqt ke manzar

jitne ajiib manzar dikhte haiñ ham ko aksar

sab khel vaqt kā hai sab vaqt ke haiñ manzar

phūloñ kā muñh dhulā.e shabnam se jab saverā

panchhī sunā.eñ paḌh kar qur.ān aur bhajan ko

kaliyāñ khilīñ chaman meñ gul mahke anjuman meñ

sūraj kī uñglī pakḌe kirneñ chalīñ chaman ko

tab vaqt kā ye pahiyā kitnā lage hai sundar

sab khel vaqt kā hai sab vaqt ke haiñ manzar

dhakne lage jo paanī sāhil ko dhīre dhīre

panchhī bhī lauT jaa.eñ jis vaqt apne van ko

sūraj lagā.e surḳhī hoñToñ pe shaam ke jab

taare sajā.eñ aa kar jab raat kī dulhan ko

ham ko bhī kitnā pyārā lagtā hai tab vo bistar

sab khel vaqt kā hai sab vaqt ke manzar

bistar pe mahñge mahñge na niiñd ho mayassar

apne sukūñ kī ḳhātir vaare dhanī jo dhan ko

aur āsmān oḌhe fōtpath pe ho soyā

chūmeñ havā.eñ aa kar mazdūr ke badan ko

insāf tab ḳhudā kā kitnā lage hai behtar

sab khel vaqt kā hai sab vaqt ke haiñ manzar

raushan ḳhayāl le kar jab jhoñpaḌe meñ bachchī

baiThī ho chīthaḌoñ se Dhak kar ke apne tan ko

aur kuchh hasīn fitne karte phireñ numā.ish

fashion ke naam par vo dikhlā.eñ haiñ badan ko

tab vaqt ke sitam par sab dekhte haiñ hañs kar

sab khel vaqt kā hai sab vaqt ke haiñ manzar

jab kuchh amiir bachche khele haiñ mercedes se

kitne lage haiñ pyāre vo duur se nayan ko

aur āñsuoñ ke dariyā meñ kuchh ġharīb bachche

ik ik khilaune ḳhātir maare haiñ apne man ko

patthar pighal paḌeñ tab is baat ko to sun kar

sab khel vaqt kā hai sab vaqt ke haiñ manzar

jab ik niDar sipāhī apne vatan kī ḳhātir

sarhad pe jaan de kar puurā kare vachan ko

aur kuchh siyāsī mohre bik jaa.eñ thoḌe dhan se

dushman se mil ke toḌeñ ḳhud apne hī vatan ko

tab dil meñ bas junūñ kā uThtā hai ik bavanDar

sab khel vaqt kā hai sab vaqt ke haiñ manzar

jab rahbaroñ kī Tolī apne bhale kī ḳhātir

hāthoñ se phūñktī ho ḳhud apne hī chaman ko

maz.hab ke naam par yuuñ ham ko laḌā laḌā kar

dozaḳh banā rahī ho jannat-nishāñ vatan ko

dil pe 'shahāb' kitne chubhte haiñ dekho nashtar

sab khel vaqt kā hai sab vaqt ke haiñ manzar

jitne ajib manzar dikhte hain hum ko aksar

sab khel waqt ka hai sab waqt ke hain manzar

phulon ka munh dhulae shabnam se jab sawera

panchhi sunaen paDh kar quran aur bhajan ko

kaliyan khilin chaman mein gul mahke anjuman mein

suraj ki ungli pakDe kirnen chalin chaman ko

tab waqt ka ye pahiya kitna lage hai sundar

sab khel waqt ka hai sab waqt ke hain manzar

dhakne lage jo pani sahil ko dhire dhire

panchhi bhi lauT jaen jis waqt apne wan ko

suraj lagae surKHi honTon pe sham ke jab

tare sajaen aa kar jab raat ki dulhan ko

hum ko bhi kitna pyara lagta hai tab wo bistar

sab khel waqt ka hai sab waqt ke manzar

bistar pe mahnge mahnge na nind ho mayassar

apne sukun ki KHatir ware dhani jo dhan ko

aur aasman oDhe footpath pe ho soya

chumen hawaen aa kar mazdur ke badan ko

insaf tab KHuda ka kitna lage hai behtar

sab khel waqt ka hai sab waqt ke hain manzar

raushan KHayal le kar jab jhonpaDe mein bachchi

baiThi ho chithaDon se Dhak kar ke apne tan ko

aur kuchh hasin fitne karte phiren numaish

fashion ke nam par wo dikhlaen hain badan ko

tab waqt ke sitam par sab dekhte hain hans kar

sab khel waqt ka hai sab waqt ke hain manzar

jab kuchh amir bachche khele hain mercedes se

kitne lage hain pyare wo dur se nayan ko

aur aansuon ke dariya mein kuchh gharib bachche

ek ek khilaune KHatir mare hain apne man ko

patthar pighal paDen tab is baat ko to sun kar

sab khel waqt ka hai sab waqt ke hain manzar

jab ek niDar sipahi apne watan ki KHatir

sarhad pe jaan de kar pura kare wachan ko

aur kuchh siyasi mohre bik jaen thoDe dhan se

dushman se mil ke toDen KHud apne hi watan ko

tab dil mein bas junun ka uThta hai ek bawanDar

sab khel waqt ka hai sab waqt ke hain manzar

jab rahbaron ki Toli apne bhale ki KHatir

hathon se phunkti ho KHud apne hi chaman ko

mazhab ke nam par yun hum ko laDa laDa kar

dozaKH bana rahi ho jannat-nishan watan ko

dil pe 'shahab' kitne chubhte hain dekho nashtar

sab khel waqt ka hai sab waqt ke hain manzar