وقت کتنا ظالم ہے

اے اجل رسیدہ دل

تو مجھے کہاں لایا

کیا یہی جگہ ہے وہ

کل جہاں حسیں چہرے

شوخ دل ربا نغمے

ساز پر امنگوں کے

جھوم جھوم جاتے تھے

دور اس پہاڑی کے

خوش نما سے ٹیلے پر

باغ ایک پھیلا تھا

جھیل کا ترنم تھا

حسن تھا جوانی تھی

کیف تھا فضاؤں میں

شوخیاں ہواؤں میں

کل یہاں کی ہر اک شے

تھی جوان اور خوش کن

تھا بہار کا عالم

آج ان کی یادوں کی

راکھ صرف اڑتی ہے

مٹ گئے حسیں چہرے

اس زمیں کے ذروں میں

کھو گئی فضاؤں میں

پھول کی مدھر خوشبو

وقت کی یہ کروٹ بھی

کس قدر انوکھی ہے

وقت کتنا جابر ہے

وقت کتنا ظالم ہے