waqt munsif hai

tumheñ ḳhabar hai kahā thā tum ne

maiñ lafz sochūñ maiñ lafz bolūñ maiñ lafz likkhūñ

maiñ lafz likhne pe zindagī ke aziiz lamhoñ ko nazr kar duuñ

maiñ lafz likkhūñ

aur un kī āñkhoñ meñ munjamid ratjagoñ ko apne lahū kī taaza harārateñ de ke

jagmagā duuñ

to maiñ baḌā huuñ

tumheñ ḳhabar hai

mirī ragoñ meñ baḌe qabīle ke shāhzāde kā ḳhuun zinda ravāñ-davāñ hai

jise mohabbat ke dushmanoñ be-zamīr logoñ ne

pyaar karne ke jurm meñ qatl kar diyā thā

yahī nahīñ balki ḳhud ko munsif banā liyā thā

kisī ne bhī ḳhūñ-bahā na māñgā

ki shahr-e-mehnat ke sab buzurgoñ ne darguzar kā sabaq diyā thā

magar vo maiñ thā ki lafz likkhe

tumheñ ḳhabar hai

ki merī būḌhī aziim maañ ne javān beToñ ko hādsoñ ke

supurd kar ke duā.eñ māñgīñ

ḳhudā-e-bartar mire lahū ko amar banā de

duā.eñ māñgeñ to un ke chehre pe guzre mausam ke saare dukh

silvaToñ kī sūrat ubhar ga.e haiñ

magar vo maflūj ho ga.ī hai

yaqīn jaano ki maiñ ne aise azaab lamhoñ meñ lafz likkhe

tumheñ ḳhabar hai

baḌī havelī ke rahne vaale tamām logoñ ko chhoḌ kar maiñ ne lafz likkhe

tumheñ ḳhabar hai

maiñ lahlahāte hasīn khetoñ ko chhoḌ shahr kī be-amāñ

fasīloñ meñ aagyā huuñ

aur apne saa.e kī khoj meñ huuñ

kahīñ mile to maiñ lafz likkhūñ

nahīñ mile to maiñ lafz likkhūñ

tumheñ ḳhabar hai kahā thā tum ne

ki vaqt munsif hai

aur vo faisla karegā

tumhein KHabar hai kaha tha tum ne

main lafz sochun main lafz bolun main lafz likkhun

main lafz likhne pe zindagi ke aziz lamhon ko nazr kar dun

main lafz likkhun

aur un ki aankhon mein munjamid ratjagon ko apne lahu ki taza hararaten de ke

jagmaga dun

to main baDa hun

tumhein KHabar hai

meri ragon mein baDe qabile ke shahzade ka KHun zinda rawan-dawan hai

jise mohabbat ke dushmanon be-zamir logon ne

pyar karne ke jurm mein qatl kar diya tha

yahi nahin balki KHud ko munsif bana liya tha

kisi ne bhi KHun-baha na manga

ki shahr-e-mehnat ke sab buzurgon ne darguzar ka sabaq diya tha

magar wo main tha ki lafz likkhe

tumhein KHabar hai

ki meri buDhi azim man ne jawan beTon ko hadson ke

supurd kar ke duaen mangin

KHuda-e-bartar mere lahu ko amar bana de

duaen mangen to un ke chehre pe guzre mausam ke sare dukh

silwaTon ki surat ubhar gae hain

magar wo mafluj ho gai hai

yaqin jaano ki main ne aise azab lamhon mein lafz likkhe

tumhein KHabar hai

baDi haweli ke rahne wale tamam logon ko chhoD kar main ne lafz likkhe

tumhein KHabar hai

main lahlahate hasin kheton ko chhoD shahr ki be-aman

fasilon mein aagya hun

aur apne sae ki khoj mein hun

kahin mile to main lafz likkhun

nahin mile to main lafz likkhun

tumhein KHabar hai kaha tha tum ne

ki waqt munsif hai

aur wo faisla karega