waqt

vo dīroz kī shaam

kab lauT kar aa sakī hai

nazar jis kī imroz-o-fardā ke chehroñ pe markūz hai

vahī is safar meñ

ufuq-zād hai

parinde bhī mehmān haiñ mausamoñ ke

jahāñ un ko paanī mile

uḌ ke us samt jaate haiñ

pīchhe palaT kar kabhī dekhte hī nahīñ

ajab ye tumhārā safar hai

ajab ye tumhārī nazar hai

ki sadiyoñ se dīroz ke is khañDar par lagī hai

jahāñ tum ko milte haiñ tārīḳh ke

pāra-pāra se bosīda aurāq

jin kī nishānī faqat

vaqt ke paas hai

suno

vaqt kī aañkh hai

vo sab dekhtā hai

nazar meñ us kī

zamān-o-makāñ

māvarā-e-zamān-o-makāñ

vaqt ke haath haiñ

vo apne hī hāthoñ se

shakleñ banātā bhī hai

aur shakloñ ko lamhoñ meñ taqsīm kar ke

pheñk detā hai in ko

abad ke kināre pe TuuTī huī

kashtiyoñ kī tarah

vaqt ke paañv haiñ

vo chaltā hai

gardish lagātā hai

bas ek hī samt meñ

us kī raftār aisī hai jaise koī

ḳhvāb meñ

din samajh le

vaqt āvāz hai

vaqt ehsās hai

vaqt patthar nahīñ

vaqt sail-e-ravāñ

vaqt mehvar hai

jis par zamīñ chal rahī hai

vaqt sūraj hai

kirnoñ se apnī

zamīñ ko rulātā bhī hai aur hañsātā bhī hai

vaqt bārish hai

tūfāñ uThātā hai

bījoñ ko phūloñ phaloñ tak kā sab fāsla

tai karātā hai

vaqt sailāb ban kar pahāḌoñ kī choTī pe chaḌhtā hai

paanī meñ rasta banātā hai

ātish ko gulzār kartā hai

aur raat kī raat soī huī bastiyoñ ko ulaTtā hai

vaqt mausam hai

patjhaḌ kī sūrat meñ saare daraḳhtoñ ke patte

girātā bhī hai

phir unheñ

ik nayā pairahan baḳhsh detā hai

vaqt aadil hai

insāf kartā hai

rātoñ meñ vo bhes apnā badal kar nikaltā hai

hātim hai

bin māñge ḳhairāt kartā hai

vaqt qātil bhī hai

aur masīhā bhī hai

zaḳhm detā bhī hai

zaḳhm bhartā bhī hai

vaqt ko tum agar jaan lete

to yuuñ ret meñ muñh chhupā kar na rote

zamīñ kī karāheñ na sunte

abhī vaqt hai

us kī āñkhoñ meñ jhāñko

na tum vaqt ko qaid hī kar sakoge

na tum vaqt ke dā.ere se nikal kar

kahīñ jā sakoge

azal aur abad ke kināre bhī

ik vāhima haiñ

haqīqat to ye hai

azal aur abad se pare

vaqt kā dā.era hai

vo dīroz kī shaam

kab lauT kar aa sakī hai

nazar jis kī imroz-o-fardā ke chehroñ pe markūz hai

vahī is safar meñ

ufuq-zād hai

wo diroz ki sham

kab lauT kar aa saki hai

nazar jis ki imroz-o-farda ke chehron pe markuz hai

wahi is safar mein

ufuq-zad hai

parinde bhi mehman hain mausamon ke

jahan un ko pani mile

uD ke us samt jate hain

pichhe palaT kar kabhi dekhte hi nahin

ajab ye tumhaara safar hai

ajab ye tumhaari nazar hai

ki sadiyon se diroz ke is khanDar par lagi hai

jahan tum ko milte hain tariKH ke

para-para se bosida auraq

jin ki nishani faqat

waqt ke pas hai

suno

waqt ki aankh hai

wo sab dekhta hai

nazar mein us ki

zaman-o-makan

mawara-e-zaman-o-makan

waqt ke hath hain

wo apne hi hathon se

shaklen banata bhi hai

aur shaklon ko lamhon mein taqsim kar ke

phenk deta hai in ko

abad ke kinare pe TuTi hui

kashtiyon ki tarah

waqt ke panw hain

wo chalta hai

gardish lagata hai

bas ek hi samt mein

us ki raftar aisi hai jaise koi

KHwab mein

din samajh le

waqt aawaz hai

waqt ehsas hai

waqt patthar nahin

waqt sail-e-rawan

waqt mehwar hai

jis par zamin chal rahi hai

waqt suraj hai

kirnon se apni

zamin ko rulata bhi hai aur hansata bhi hai

waqt barish hai

tufan uThata hai

bijon ko phulon phalon tak ka sab fasla

tai karaata hai

waqt sailab ban kar pahaDon ki choTi pe chaDhta hai

pani mein rasta banata hai

aatish ko gulzar karta hai

aur raat ki raat soi hui bastiyon ko ulaTta hai

waqt mausam hai

patjhaD ki surat mein sare daraKHton ke patte

giraata bhi hai

phir unhen

ek naya pairahan baKHsh deta hai

waqt aadil hai

insaf karta hai

raaton mein wo bhes apna badal kar nikalta hai

hatim hai

bin mange KHairaat karta hai

waqt qatil bhi hai

aur masiha bhi hai

zaKHm deta bhi hai

zaKHm bharta bhi hai

waqt ko tum agar jaan lete

to yun ret mein munh chhupa kar na rote

zamin ki karahen na sunte

abhi waqt hai

us ki aankhon mein jhanko

na tum waqt ko qaid hi kar sakoge

na tum waqt ke daere se nikal kar

kahin ja sakoge

azal aur abad ke kinare bhi

ek wahima hain

haqiqat to ye hai

azal aur abad se pare

waqt ka daera hai

wo diroz ki sham

kab lauT kar aa saki hai

nazar jis ki imroz-o-farda ke chehron pe markuz hai

wahi is safar mein

ufuq-zad hai