wasf-e-zaban

ai zabāñ tū nutq meñ aa kar banī jādū-bayāñ

tū ne khole raaz vo ab tak jo the dil meñ nihāñ

kis qadar shīrīñ haiñ naġhme tere sāz-e-nutq meñ

ban ga.ī tū ik tilism-e-turfa rāz-e-nutq meñ

sho.ala-e-javvāla hai tū bazm-gāh-e-razm meñ

sulh-e-ma.anī-ḳhez hai tū razm-gāh-e-bazm meñ

tū hī jā kar ban ga.ī lab par papīhe ke fuġhāñ

tū hī koyal kī banī bāġhoñ meñ jā kar rāz-dāñ

tū ne hī taqrīr meñ rūh-e-talāqat phūñk dī

paa.ī hai shīrāza-e-dil ne tujhī se zindagī

aap hī naġhmoñ meñ apne mast hai sarshār hai

aap hī tū chārāgar hai aap hī bīmār hai

laḌne vāloñ ke diloñ meñ tū baḌhā detī hai josh

sulh-mañdoñ ke dimāġhoñ ko dilā detī hai hosh

hai marīzoñ ke liye sarmāya-e-taskīñ tū hī

ġham-zada rāñDoñ kī ban jaatī hai tū hī zindagī

qabza-e-qudrat meñ tere zaḳhm bhī marham bhī hai

tere chehre se ḳhushī bhī hai numāyāñ ġham bhī hai

tū sulā detī hai afsāne sunā kar aish ke

niiñd uḌā detī hai tū jalve dikhā kar aish ke

ai zaban tu nutq mein aa kar bani jadu-bayan

tu ne khole raaz wo ab tak jo the dil mein nihan

kis qadar shirin hain naghme tere saz-e-nutq mein

ban gai tu ek tilism-e-turfa raaz-e-nutq mein

shoala-e-jawwala hai tu bazm-gah-e-razm mein

sulh-e-mani-KHez hai tu razm-gah-e-bazm mein

tu hi ja kar ban gai lab par papihe ke fughan

tu hi koyal ki bani baghon mein ja kar raaz-dan

tu ne hi taqrir mein ruh-e-talaqat phunk di

pai hai shiraaza-e-dil ne tujhi se zindagi

aap hi naghmon mein apne mast hai sarshaar hai

aap hi tu chaaragar hai aap hi bimar hai

laDne walon ke dilon mein tu baDha deti hai josh

sulh-mandon ke dimaghon ko dila deti hai hosh

hai marizon ke liye sarmaya-e-taskin tu hi

gham-zada ranDon ki ban jati hai tu hi zindagi

qabza-e-qudrat mein tere zaKHm bhi marham bhi hai

tere chehre se KHushi bhi hai numayan gham bhi hai

tu sula deti hai afsane suna kar aish ke

nind uDa deti hai tu jalwe dikha kar aish ke