wasl-e-shirin ke liye

duur takzīb kā farhād huuñ merī ḳhātir

haq kī āvāz sadāqat kī aur shīrīñ hai

merā mansab hai husūl-e-shīrīñ

vasl-e-shīrīñ ke liye tesha uThātā huuñ maiñ

tesha-e-azm-o-yaqīñ jo abhī kund nahīñ

sīna-e-sañg abhī ḳhushk nahīñ

har rag sañg meñ ik juue ravāñ pinhāñ hai

maiñ ki farhād huuñ rag rag meñ mirī

sho.ala-e-qatra-e-ḳhūñ jaulāñ hai

merī gardan pe hai sarbār amānat kī tarah

mere hī teshe se kaT saktā hai lekin ye kabhī

jhuk to saktā hī nahīñ

juT ga.e haath uThe aur bane ek kamāñ

TuuT saktī nahīñ hāthoñ kī kamāñ

chhūT saktā nahīñ tesha merā

is kī har zarb-e-javāñ se jab tak

reza reza nahīñ ho

zulm-o-takzīb kā ye koh-e-girāñ

dur takzib ka farhad hun meri KHatir

haq ki aawaz sadaqat ki aur shirin hai

mera mansab hai husul-e-shirin

wasl-e-shirin ke liye tesha uThata hun main

tesha-e-azm-o-yaqin jo abhi kund nahin

sina-e-sang abhi KHushk nahin

har rag sang mein ek jue rawan pinhan hai

main ki farhad hun rag rag mein meri

shoala-e-qatra-e-KHun jaulan hai

meri gardan pe hai sarbar amanat ki tarah

mere hi teshe se kaT sakta hai lekin ye kabhi

jhuk to sakta hi nahin

juT gae hath uThe aur bane ek kaman

TuT sakti nahin hathon ki kaman

chhuT sakta nahin tesha mera

is ki har zarb-e-jawan se jab tak

reza reza nahin ho

zulm-o-takzib ka ye koh-e-giran