wasl ke baad

dard-e-dil so bhī chukā Dhal bhī chukā vasl kā chāñd

anjum-e-sub.h khilā ḳhatm huā shab kā safar

tiir kirnoñ ke chale zaḳhm hue phir gahre

lag ga.ī laila-e-shab ko bhī sitāroñ kī nazar

jal bujhe pyaar kī ḳhush-rang tamannā ke charāġh

phir sulagne lagā har saañs meñ aahoñ kā dhuāñ

phir tasavvur ke jazīre kī fazā hai maġhmūm

phir dar-o-bām pe chhāyā hai udāsī kā samāñ

dhul ga.ī raat ke māthe kī damaktī bindiyā

tīliyāñ nuur kī ḳhvābīda nigāhoñ meñ chubhīñ

phir rule ḳhaak meñ shabnam ke larazte motī

yuuñ bujhī sham.eñ bahāroñ kī ki dekhī na ga.iiñ

fasl-e-gul haar ga.ī daur-e-ḳhizāñ jiit gayā

aa gayā ahd-e-sitam ahd-e-vafā biit gayā

dil gayā dil se bujhī husn-e-shagufta kī nazar

ḳhūn-e-zulmāt se labrez huā jām-e-sahar

dard-e-dil so bhi chuka Dhal bhi chuka wasl ka chand

anjum-e-subh khila KHatm hua shab ka safar

tir kirnon ke chale zaKHm hue phir gahre

lag gai laila-e-shab ko bhi sitaron ki nazar

jal bujhe pyar ki KHush-rang tamanna ke charagh

phir sulagne laga har sans mein aahon ka dhuan

phir tasawwur ke jazire ki faza hai maghmum

phir dar-o-baam pe chhaya hai udasi ka saman

dhul gai raat ke mathe ki damakti bindiya

tiliyan nur ki KHwabida nigahon mein chubhin

phir rule KHak mein shabnam ke larazte moti

yun bujhi shamen bahaaron ki ki dekhi na gain

fasl-e-gul haar gai daur-e-KHizan jit gaya

aa gaya ahd-e-sitam ahd-e-wafa bit gaya

dil gaya dil se bujhi husn-e-shagufta ki nazar

KHun-e-zulmat se labrez hua jam-e-sahar