wijdan

jab merī miTTī aur zamīn

sard safed chādar meñ lipTī

hijr kī rut meñ

sochoñ meñ ḳhizāñ kī zardī milā dī

maiñ ne harf-e-duā

qirtās-e-qalb par

terī yaad kī raushnā.ī se likhā

aur mohabbat ne

ashkoñ kī muhr lagā.ī

qubūliyat kā talabgār

merā junūn

kisī khaa.ī se

ek qadam kī duurī par khaḌā

āḳhirī samt

nahīñ dekh saktā

be-qarār dil

aur ruḳhsār kā til

āsūda ḳhayāl kī āmezish ko

miTTī ke murakkab se

judā karne kā nusḳha nahīñ jānte

magar āyat-e-vasl ke dard se

ye mo.ajiza huā

mujhe zarūrat aur fitrat se māvarā

mohabbat kī ma.anaviyyat kā

qutbī sitāra nazar aane lagā

jab meri miTTi aur zamin

sard safed chadar mein lipTi

hijr ki rut mein

sochon mein KHizan ki zardi mila di

main ne harf-e-dua

qirtas-e-qalb par

teri yaad ki raushnai se likha

aur mohabbat ne

ashkon ki muhr lagai

qubuliyat ka talabgar

mera junun

kisi khai se

ek qadam ki duri par khaDa

aaKHiri samt

nahin dekh sakta

be-qarar dil

aur ruKHsar ka til

aasuda KHayal ki aamezish ko

miTTi ke murakkab se

juda karne ka nusKHa nahin jaante

magar aayat-e-wasl ke dard se

ye moajiza hua

mujhe zarurat aur fitrat se mawara

mohabbat ki manawiyyat ka

qutbi sitara nazar aane laga