wirasat

tumheñ tumhāre ghar se

binā notice ke nikāl diyā gayā

muqaddas kitāb kī bolī lagā.ī ga.ī

tasbīh ke daane bikher diye ga.e

jā-namāzeñ hamesha ke liye tah kar dī ga.iiñ

jaane itne barsoñ ik parā.e ghar meñ

kyoñ paḌe rahe tum

tumheñ to us dam hī chal denā thā

jab rātoñ raat ik chor ne

tumhāre āñgan meñ sendh lagā.ī thī

jab tumhāre ghar kī īñToñ par se

tumhārā naam miTāyā jā rahā thā

tumhāre mimbar ke nīche

qabl-e-masīh ke biij talāshe jā rahe the

tumhāre darvāze ke bāhar khaḌā

koī aur

tumhāre ghar meñ apnā ghar dekh rahā thā

us ne apne baap ke vāste

rāj-mahal chhoḌ diyā thā

tum ne apne bachchoñ kī ḳhātir

apnā ghar kyoñ nahīñ tyaag diyā

jo tumhāre ghar ke malbe par

apne apne naam kī taḳhtī lagānā chāhte haiñ

un se kah do

ki tum ne aur is sūryavanshi ne

unheñ apnī virāsat se

kab kā aaq kar diyā hai

tumhein tumhaare ghar se

bina notice ke nikal diya gaya

muqaddas kitab ki boli lagai gai

tasbih ke dane bikher diye gae

ja-namazen hamesha ke liye tah kar di gain

jaane itne barson ek parae ghar mein

kyon paDe rahe tum

tumhein to us dam hi chal dena tha

jab raaton raat ek chor ne

tumhaare aangan mein sendh lagai thi

jab tumhaare ghar ki inTon par se

tumhaara nam miTaya ja raha tha

tumhaare mimbar ke niche

qabl-e-masih ke bij talashe ja rahe the

tumhaare darwaze ke bahar khaDa

koi aur

tumhaare ghar mein apna ghar dekh raha tha

us ne apne bap ke waste

raj-mahal chhoD diya tha

tum ne apne bachchon ki KHatir

apna ghar kyon nahin tyag diya

jo tumhaare ghar ke malbe par

apne apne nam ki taKHti lagana chahte hain

un se kah do

ki tum ne aur is suryawanshi ne

unhen apni wirasat se

kab ka aaq kar diya hai