wirus

masīh-e-vaqt tum batāo kyā huā

zabāñ pe ye kasīlā-pan kahāñ se aa gayā

zarā sī der ke liye palak jhapak ga.ī

to raakh kis tarah jhaḌī

sunā hai duur des se

kuchh aise virus hamāre sāhiloñ pe aa ga.e

jin ke tāb-kār-e-sahar ke liye

amrit aur zahr ek haiñ

ab kisī ke darmiyān koī rābta nahīñ

kisī davā kā dard se koī vāsta nahīñ

ham havā kī mauj mauj se

dard khīñchte haiñ chhoḌte haiñ saañs kī tarah

lahū kī ek ek buuñd zaḳhm ban ga.ī

ragoñ meñ jaise bad-duā.eñ tairtī haiñ

phāñs kī tarah

masīh-e-vaqt tum batāo kyā huā

dev ilm ke charāġh kā

kyuuñ bhalā biphar gayā

dhuāñ dhuāñ bikhar gayā

suno ki chīḳhtā hai kaam kaam

koī kaam

jaao sāhiloñ kī samt ho sake to rok lo

is na.e azaab ko

nāḳhudā kī āḳhirī shikast tak

samundaroñ kī ret chhānte raho

masih-e-waqt tum batao kya hua

zaban pe ye kasila-pan kahan se aa gaya

zara si der ke liye palak jhapak gai

to rakh kis tarah jhaDi

suna hai dur des se

kuchh aise wirus hamare sahilon pe aa gae

jin ke tab-kar-e-sahar ke liye

amrit aur zahr ek hain

ab kisi ke darmiyan koi rabta nahin

kisi dawa ka dard se koi wasta nahin

hum hawa ki mauj mauj se

dard khinchte hain chhoDte hain sans ki tarah

lahu ki ek ek bund zaKHm ban gai

ragon mein jaise bad-duaen tairti hain

phans ki tarah

masih-e-waqt tum batao kya hua

dew ilm ke charagh ka

kyun bhala biphar gaya

dhuan dhuan bikhar gaya

suno ki chiKHta hai kaam kaam

koi kaam

jao sahilon ki samt ho sake to rok lo

is nae azab ko

naKHuda ki aaKHiri shikast tak

samundaron ki ret chhante raho