visaliya

sab bārisheñ ho ke tham chukī thiiñ

rūhoñ meñ dhanak utar rahī thī

maiñ ḳhvāb meñ baat kar rahā thā

vo niiñd meñ pyaar kar rahī thī

ahvāl hī aur ho rahe the

lazzat meñ visāl ro rahe the

bosoñ meñ dhule-dhulā.e donoñ

nashshe meñ lipaT ke so rahe the

chhoTā sā hasīn sā vo kamra

ik ālam-e-ḳhvāb ho rahā thā

ḳhushbū se gulāb ho rahā thā

mastī se sharāb ho rahā thā

vo chhāñv sā chāñdnī sā bistar

ham rañg nahā rahe the jis par

yuuñ thā ki ham apnī zaat ke andar

the apnā hī ek aur manzar

sairāb mohabbatoñ ke dhāre

bāham the vajūd ke kināre

mauzū-e-suḳhan, suḳhan the saare

aalam hī ajiib the hamāre

jaage vo lahū meñ silsile phir

tan man ke vahī the zā.iqe phir

tham tham ke baras baras ga.e phir

pātāl tak ho ga.e hare phir

jaarī thā vo raqs-e-ham-kinārī

niklī na.ī sub.h kī savārī

aisā lagā kā.enāt saarī

is aan to hai faqat hamārī

jab chāñd mirā nahā ke niklā

maiñ dil ko diyā banā ke niklā

kashkol-e-duā uThā ke niklā

shā.er thā sadā lagā ke niklā

dariyā vo samundaroñ se gahre

vo ḳhvāb gulāb aise chehre

sab zāviyoñ ho ga.e sunahre

ā.īnoñ meñ jab vo aa ke Thahre

sab barishen ho ke tham chuki thin

ruhon mein dhanak utar rahi thi

main KHwab mein baat kar raha tha

wo nind mein pyar kar rahi thi

ahwal hi aur ho rahe the

lazzat mein visal ro rahe the

boson mein dhule-dhulae donon

nashshe mein lipaT ke so rahe the

chhoTa sa hasin sa wo kamra

ek aalam-e-KHwab ho raha tha

KHushbu se gulab ho raha tha

masti se sharab ho raha tha

wo chhanw sa chandni sa bistar

hum rang naha rahe the jis par

yun tha ki hum apni zat ke andar

the apna hi ek aur manzar

sairab mohabbaton ke dhaare

baham the wajud ke kinare

mauzu-e-suKHan, suKHan the sare

aalam hi ajib the hamare

jage wo lahu mein silsile phir

tan man ke wahi the zaiqe phir

tham tham ke baras baras gae phir

patal tak ho gae hare phir

jari tha wo raqs-e-ham-kinari

nikli nai subh ki sawari

aisa laga kaenat sari

is aan to hai faqat hamari

jab chand mera naha ke nikla

main dil ko diya bana ke nikla

kashkol-e-dua uTha ke nikla

shaer tha sada laga ke nikla

dariya wo samundaron se gahre

wo KHwab gulab aise chehre

sab zawiyon ho gae sunahre

aainon mein jab wo aa ke Thahre