wo aalam KHwab ka tha

vo aalam ḳhvāb kā thā

so rahe the sab

magar ik vo

akelā jaag uThā thā

kuchh aise niiñd TuuTī thī

ki har har uzv be-kal thā

badan saarā

taġhayyur kī talab meñ

māhī-be-āb kī sūrat taḌaptā thā

junūn-o-be-qarārī ne

ragoñ meñ bijliyāñ bhar diiñ

hazāroñ saal se rakkhe hue patthar ko sarkāyā

vo apne ġhaar se bāhar nikal aayā

nigāheñ raushnī se chaar ho kar juuñ hī palTīñ

us ne ḳhud ko

zindagī se vasl ke imkān meñ paayā

bahut lambā bahut dushvār rasta tai kiyā us ne

na jaane kitne dariyā koh-o-sahrā darmiyāñ aa.e

tilism-o-haft-ḳhvāñ aa.e

tab us shahr-e-buland-o-bāla-o-pur-kaif meñ pahuñchā

jahāñ insān aur haivān sab bedār rahte the

baḌe be-ḳhār hote the

zabāñ thī suukh ke kāñTā

papoTe phuul ke kuppā

ki us par jāgte rahne kā aisā shauq ġhālib thā

badan vahshat kā tālib thā

magar ye kyā

use ma.alūm ye kab thā

zarā jo muḳhtalif ho

shahr-e-bedārāñ meñ us par kyā guzartī hai

dukāneñ jin kī ūñchī thiiñ

use muḳhbir samajhte the

jo māsha-ḳhor the pherī lagāte the

use pāgal batāte the

vahāñ bāzār meñ koī use kuchh bhī na detā thā

jo sikke paas the us ke unheñ koī na letā thā

vo vāpas jā na saktā thā

ḳhudā-e-lam-yazal ke hukm se

us ġhaar kā muñh band thā phir se

ajab be-yāvarī nā-āshnā.ī thī

sazā mahz us ne

aañkh khul jaane kī paa.ī thī

wo aalam KHwab ka tha

so rahe the sab

magar ek wo

akela jag uTha tha

kuchh aise nind TuTi thi

ki har har uzw be-kal tha

badan sara

taghayyur ki talab mein

mahi-be-ab ki surat taDapta tha

junun-o-be-qarari ne

ragon mein bijliyan bhar din

hazaron sal se rakkhe hue patthar ko sarkaya

wo apne ghaar se bahar nikal aaya

nigahen raushni se chaar ho kar jun hi palTin

us ne KHud ko

zindagi se wasl ke imkan mein paya

bahut lamba bahut dushwar rasta tai kiya us ne

na jaane kitne dariya koh-o-sahra darmiyan aae

tilism-o-haft-KHwan aae

tab us shahr-e-buland-o-baala-o-pur-kaif mein pahuncha

jahan insan aur haiwan sab bedar rahte the

baDe be-KHar hote the

zaban thi sukh ke kanTa

papoTe phul ke kuppa

ki us par jagte rahne ka aisa shauq ghaalib tha

badan wahshat ka talib tha

magar ye kya

use malum ye kab tha

zara jo muKHtalif ho

shahr-e-bedaran mein us par kya guzarti hai

dukanen jin ki unchi thin

use muKHbir samajhte the

jo masha-KHor the pheri lagate the

use pagal batate the

wahan bazar mein koi use kuchh bhi na deta tha

jo sikke pas the us ke unhen koi na leta tha

wo wapas ja na sakta tha

KHuda-e-lam-yazal ke hukm se

us ghaar ka munh band tha phir se

ajab be-yawari na-ashnai thi

saza mahz us ne

aankh khul jaane ki pai thi