wo aurat

maiñ ne us aurat kā jism bistar-band meñ lapeT diyā

bistar-band ko railway station ke māl-godām meñ rakhvā diyā

sāmān kī rasīd ko apnī billī ke duudh meñ Daal diyā

jo us kāġhaz ke saare lafz chaaT ga.ī

maiñ ne kamre meñ bikhrā lahū sameT kar

dilhanoñ kī maañg meñ bhar diyā

us ke kapḌe chhīthḌe banā kar

mazāroñ ke daraḳhtoñ par bāñdh diye

ki un ke gird pherā lagāne vaalī bāñjh auratoñ ke peT meñ phuul ugeñ

us kā naam shahr ke daraḳhtoñ ke tanoñ par khod diyā

ki mausamoñ kī havā.eñ har daf.a use chūmtī raheñ

aur daraḳhtoñ kī khaal vaqt ke saath us par hijāb le aa.e

us ke saath guzrā vaqt, tasvīreñ, yādeñ

ek sandūq meñ band kar ke godām meñ rakh diiñ

ki vaqt in ko dīmak kī tarah chaaT jā.egā

kamre meñ paḌā cleopatra kā but us kī aur madonna kī tasvīr

borī meñ band kar ke dariyā meñ pheñk diye

zehn kī tape se us kā har naqsh

nāḳhunoñ se khurach diyā

hāthoñ ko dettol se dho diyā

kyā mujhe us se bahut mohabbat thii?

main ne us aurat ka jism bistar-band mein lapeT diya

bistar-band ko railway station ke mal-godam mein rakhwa diya

saman ki rasid ko apni billi ke dudh mein Dal diya

jo us kaghaz ke sare lafz chaT gai

main ne kamre mein bikhra lahu sameT kar

dilhanon ki mang mein bhar diya

us ke kapDe chhithDe bana kar

mazaron ke daraKHton par bandh diye

ki un ke gird phera lagane wali banjh auraton ke peT mein phul ugen

us ka nam shahr ke daraKHton ke tanon par khod diya

ki mausamon ki hawaen har dafa use chumti rahen

aur daraKHton ki khaal waqt ke sath us par hijab le aae

us ke sath guzra waqt, taswiren, yaaden

ek sanduq mein band kar ke godam mein rakh din

ki waqt in ko dimak ki tarah chaT jaega

kamre mein paDa cleopatra ka but us ki aur madonna ki taswir

bori mein band kar ke dariya mein phenk diye

zehn ki tape se us ka har naqsh

naKHunon se khurach diya

hathon ko dettol se dho diya

kya mujhe us se bahut mohabbat thi?