wo aurat thi

vo aurat thī

magar ik ruup meñ honā ise hargiz na bhātā thā

vo himmat meñ koī mard-e-tavānā thī jise mehnat mohabbat aur

insānī zamānī jāvedānī falsafoñ ke tahat jiinā thā

vo aisī rāhiba thī

jis ke dāman meñ duā.eñ thiiñ

davā.eñ thiiñ

munājāteñ tamannā.eñ vafā.eñ kāmnā.eñ

sab use taqsīm karnā thā

vo maañ thī

jis ne saa.e meñ chhupā rakkhe the dukh un ātmāoñ ke

jinheñ mahrūmiyat mīrās miltī thī

use āzār apnānā bahut achchhā lagā kartā thā

usī ne dard siine meñ basāne ke hunar se naam paayā thā

bahan thī

jis ne bhaa.ī kah diyā to laaj rakh kar ke dikhāyā bhī

vo har ik dukh ko apnā dukh samajhtī thī

magar apnī ḳhushī auroñ meñ reza reza yuuñ taqsīm kartī thī

ki jaise us ko qismat ne muqarrar kar rakhā hogā

sunā hai us ke jā chukne se saare shahr meñ vo dard phailā hai

jise us ne

chhupā rakkhā thā siine meñ

sunā hai bastī vaale log us ko yaad karte haiñ

har ik bachcha yatīmī ro rahā hai

bain karte haiñ vo sab jin ko

zamāne ne ġharībī aur mahrūmī navāzī thī

sunā hai us ko vo bhī ro rahe haiñ jin ko aañsū rolnā aatā nahīñ thā

sunā hai shahr ke goshoñ meñ us kī shabnamī āvāz saare dard lauTāne ko Thahrī hai

sunā hai us ne ab is shahr se muñh moḌne kī Thaan rakkhī hai

vo aurat thī

magar ik ruup meñ jiinā use aatā nahīñ thā

wo aurat thi

magar ek rup mein hona ise hargiz na bhata tha

wo himmat mein koi mard-e-tawana thi jise mehnat mohabbat aur

insani zamani jawedani falsafon ke tahat jina tha

wo aisi rahiba thi

jis ke daman mein duaen thin

dawaen thin

munajaten tamannaen wafaen kaamnaen

sab use taqsim karna tha

wo man thi

jis ne sae mein chhupa rakkhe the dukh un aatmaon ke

jinhen mahrumiyat miras milti thi

use aazar apnana bahut achchha laga karta tha

usi ne dard sine mein basane ke hunar se nam paya tha

bahan thi

jis ne bhai kah diya to laj rakh kar ke dikhaya bhi

wo har ek dukh ko apna dukh samajhti thi

magar apni KHushi auron mein reza reza yun taqsim karti thi

ki jaise us ko qismat ne muqarrar kar rakha hoga

suna hai us ke ja chukne se sare shahr mein wo dard phaila hai

jise us ne

chhupa rakkha tha sine mein

suna hai basti wale log us ko yaad karte hain

har ek bachcha yatimi ro raha hai

bain karte hain wo sab jin ko

zamane ne gharibi aur mahrumi nawazi thi

suna hai us ko wo bhi ro rahe hain jin ko aansu rolna aata nahin tha

suna hai shahr ke goshon mein us ki shabnami aawaz sare dard lauTane ko Thahri hai

suna hai us ne ab is shahr se munh moDne ki Than rakkhi hai

wo aurat thi

magar ek rup mein jina use aata nahin tha