وہ جو تجھ سے پہلے کا ذکر تھا

وہ جو تجھ سے پہلے کا ذکر تھا

وہ جو تجھ سے پہلے کی راہ تھی

کہیں صبح ذات لٹی ہوئی

کہیں شام عشق بجھی ہوئی

کہیں دوپہر رہ ماندگاں پہ تنی ہوئی

کہیں چاند پچھلے وصال کے

کہیں مہر صبح کمال کے

کہیں زلف وصل مزاج پر تہ گرد ہجر جمی ہوئی

کہیں آس تھی کہیں پیاس تھی

کہیں خشک حلق میں تیر تھا

کہیں سائبان جلا ہوا کہیں بادبان میں چھید تھا

کوئی راز تھا کوئی بھید تھا

جسے مخبروں جسے تاجروں نے رقم کیا

تو کتاب میں

مرا حکم میرے خلاف تھا

میرا عدل میری نظیر تھا سو حقیر تھا

مرا بادشہ بھی فقیر تھا

یہ جو تیرے ہونے کا ذکر ہے

جو ترے ظہور کی بات ہے

مری بات ہے

مرا عشق ہے مرا درد ہے

مرے حرف و صوت کی ذات ہے

مری راہ پر مری چھاؤں ہے

مرے ہات میں مرا ہات ہے