wo jo tujhse pahle ka zikr tha

vo jo tujh se pahle kā zikr thā

vo jo tujh se pahle kī raah thī

kahīñ sub.h-e-zāt luTī huī

kahīñ shām-e-ishq bujhī huī

kahīñ dopahar rah-e-māñdagāñ pe tanī huī

kahīñ chāñd pichhle visāl ke

kahīñ mehr sub.h-e-kamāl ke

kahīñ zulf-e-vasl-mizāj par tah-e-gard-e-hijr jamī huī

kahīñ aas thī kahīñ pyaas thī

kahīñ ḳhushk halq meñ tiir thā

kahīñ sā.ebān jalā huā kahīñ bādbān meñ chhed thā

koī raaz thā koī bhed thā

jise muḳhbiroñ jise tājiroñ ne raqam kiyā

to kitāb meñ

mirā hukm mere ḳhilāf thā

merā 'adl merī nazīr thā so haqīr thā

mirā bādshah bhī faqīr thā

ye jo tere hone kā zikr hai

jo tire zuhūr kī baat hai

mirī baat hai

mirā 'ishq hai mirā dard hai

mire harf-o-saut kī zaat hai

mirī raah par mirī chhāñv hai

mire haat meñ mirā haat hai

wo jo tujh se pahle ka zikr tha

wo jo tujh se pahle ki rah thi

kahin subh-e-zat luTi hui

kahin sham-e-ishq bujhi hui

kahin dopahar rah-e-mandagan pe tani hui

kahin chand pichhle visal ke

kahin mehr subh-e-kamal ke

kahin zulf-e-wasl-mizaj par tah-e-gard-e-hijr jami hui

kahin aas thi kahin pyas thi

kahin KHushk halq mein tir tha

kahin saeban jala hua kahin baadban mein chhed tha

koi raaz tha koi bhed tha

jise muKHbiron jise tajiron ne raqam kiya

to kitab mein

mera hukm mere KHilaf tha

mera 'adl meri nazir tha so haqir tha

mera baadshah bhi faqir tha

ye jo tere hone ka zikr hai

jo tere zuhur ki baat hai

meri baat hai

mera 'ishq hai mera dard hai

mere harf-o-saut ki zat hai

meri rah par meri chhanw hai

mere hat mein mera hat hai