wo kaenat wo aalam

tasavvurāt kī duniyā ko DhūñDhtā huuñ ki ziist

tire taqāzoñ kī had naqsha-e-jahāñ meñ nahīñ

tujhe ḳhabar hai ajal bārhā mire ghar se

mirī udāsī pe aañsū bahā ke lauT ga.ī

nahīñ ki mere muqaddar meñ inqalāb nahīñ

faqat ye terī tahī-dāmanī hai jis ke tufail

tire tarāshe hue but dayār-e-hastī meñ

asīr-e-ranj-o-gadā.ī-nasīb haiñ ab tak

tujhe ab apne tamāshe pe naaz hogā magar

tujhe ḳhabar hai ye kam bā.is-e-malāl nahīñ

malāl tujh ko tirī kam-nasībiyoñ pe fuġhāñ

agar ḳhush aa.e to aa.e ki merī bazm-e-ḳhayāl

abhī javāñ hai hasīñ hai aur aise aalam meñ

ajab nahīñ ki mirī chashm-e-fikr pā jaa.e

vo kā.enāt vo aalam ki jis ko har lamha

na.e-navele dhuñdalke sañvārā karte haiñ

tasawwuraat ki duniya ko DhunDhta hun ki zist

tere taqazon ki had naqsha-e-jahan mein nahin

tujhe KHabar hai ajal barha mere ghar se

meri udasi pe aansu baha ke lauT gai

nahin ki mere muqaddar mein inqalab nahin

faqat ye teri tahi-damani hai jis ke tufail

tere tarashe hue but dayar-e-hasti mein

asir-e-ranj-o-gadai-nasib hain ab tak

tujhe ab apne tamashe pe naz hoga magar

tujhe KHabar hai ye kam bais-e-malal nahin

malal tujh ko teri kam-nasibiyon pe fughan

agar KHush aae to aae ki meri bazm-e-KHayal

abhi jawan hai hasin hai aur aise aalam mein

ajab nahin ki meri chashm-e-fikr pa jae

wo kaenat wo aalam ki jis ko har lamha

nae-nawele dhundalke sanwara karte hain