wo shaKHs

dekhne meñ gulāb thā vo shaḳhs

rū-kash-e-āftāb thā vo shaḳhs

ḳhud-nigar ḳhud-numā ḳhudā jaisā

tantana thā itaab thā vo shaḳhs

dil meñ kuchh thā zabān par kuchh thā

phir bhī kyā kāmyāb thā vo shaḳhs

be-talab thī kabhī atā us kī

be-sabab kā itaab thā vo shaḳhs

gaah sanjīda gaah ḳhandīda

ek muamma janāb thā vo shaḳhs

aap apnī misāl thā goyā

aap apnā javāb thā vo shaḳhs

chaal mastāna aañkh mai-ḳhāna

mai-kade kā shabāb thā vo shaḳhs

fitna-gar thā magar ba-faiz-e-zabāñ

na.ara-e-inqilāb thā vo shaḳhs

roġhan-e-qāz thā bahut arzāñ

baḳhshish-e-be-hisāb thā vo shaḳhs

mushta.il jaise ātish-e-sozāñ

aur kabhī jū-e-āb thā vo shaḳhs

us meñ sīmāb jaise pinhāñ thā

mustaqil iztirāb thā vo shaḳhs

phir huā yuuñ ki jazr-o-mad ke sabab

nazr-e-tūfān-e-āb thā vo shaḳhs

bijliyoñ kā shabāb thā vo shaḳhs

rū-kash-e-āftāb thā vo shaḳhs

us ko dekho to dekhte rah jaao

ḳhūb-rū be-hisāb thā vo shaḳhs

dīdanī thī shaguftagī us kī

ik mahaktā gulāb thā vo shaḳhs

naġhma-e-jāñ thī har sadā us kī

jaise tār-e-rabāb thā vo shaḳhs

mañba-e-nūr the lab-o-ruḳhsār

chāñd sūraj kā baab thā vo shaḳhs

aa.ina thā vo zaat kā apnī

aap apnā javāb thā vo shaḳhs

mere paimāna-e-mohabbat meñ

zindagī kī sharāb thā vo shaḳhs

nīchī nazreñ jhukī huī palkeñ

ik sarāpā hijāb thā vo shaḳhs

lafz milte nahīñ sarāpā ko

kis qadar lā-javāb thā vo shaḳhs

ik zamāne ke baad kal dekhā

phir bhī khiltā gulāb thā vo shaḳhs

dekhne mein gulab tha wo shaKHs

ru-kash-e-aftab tha wo shaKHs

KHud-nigar KHud-numa KHuda jaisa

tantana tha itab tha wo shaKHs

dil mein kuchh tha zaban par kuchh tha

phir bhi kya kaamyab tha wo shaKHs

be-talab thi kabhi ata us ki

be-sabab ka itab tha wo shaKHs

gah sanjida gah KHandida

ek muamma janab tha wo shaKHs

aap apni misal tha goya

aap apna jawab tha wo shaKHs

chaal mastana aankh mai-KHana

mai-kade ka shabab tha wo shaKHs

fitna-gar tha magar ba-faiz-e-zaban

nara-e-inqilab tha wo shaKHs

roghan-e-qaz tha bahut arzan

baKHshish-e-be-hisab tha wo shaKHs

mushtail jaise aatish-e-sozan

aur kabhi ju-e-ab tha wo shaKHs

us mein simab jaise pinhan tha

mustaqil iztirab tha wo shaKHs

phir hua yun ki jazr-o-mad ke sabab

nazr-e-tufan-e-ab tha wo shaKHs

bijliyon ka shabab tha wo shaKHs

ru-kash-e-aftab tha wo shaKHs

us ko dekho to dekhte rah jao

KHub-ru be-hisab tha wo shaKHs

didani thi shaguftagi us ki

ek mahakta gulab tha wo shaKHs

naghma-e-jaan thi har sada us ki

jaise tar-e-rabab tha wo shaKHs

manba-e-nur the lab-o-ruKHsar

chand suraj ka bab tha wo shaKHs

aaina tha wo zat ka apni

aap apna jawab tha wo shaKHs

mere paimana-e-mohabbat mein

zindagi ki sharab tha wo shaKHs

nichi nazren jhuki hui palken

ek sarapa hijab tha wo shaKHs

lafz milte nahin sarapa ko

kis qadar la-jawab tha wo shaKHs

ek zamane ke baad kal dekha

phir bhi khilta gulab tha wo shaKHs