woTon ke gadagar

dar pe aa.e haiñ jī voToñ ke gadāgar dekho

māñgte haiñ bhiik kaise giḌgiḌā kar dekho

phir na dekhoge inheñ pāñch baras yaaro

in kī sūrat ko bhī jāoge taras yaaro

aaj jī bhar ke karo in ke daras yaaro

aaj paas aa ke nazar in se milā kar dekho

dar pe aa.e haiñ jī voToñ ke gadāgar dekho

ab to kahte haiñ ki paanī bhī bhareñge ye

jo na ab tak kar sake vo ab kareñge ye

ab na vā'de se kabhī apne phireñge ye

kahte haiñ ik baar phir se aazmā kar dekho

dar pe aa.e haiñ jī voToñ ke gadāgar dekho

in meñ shāmil haiñ bure bhī aur change bhī

kuchh sharāfat ke haiñ putle kuchh lafange bhī

chand ik ne to karā.e hoñge dange bhī

sab ke sab kaise khaḌe haiñ sar jhukā kar dekho

dar pe aa.e haiñ jī voToñ ke gadāgar dekho

in meñ rahzan bhī chhupe haiñ rāhbar bhī haiñ

jāhil-o-an-paḌh bhī haiñ ahl-e-nazar bhī haiñ

machhliyāñ chhoTī baḌī moTe magar bhī haiñ

in ke mukhḌoñ se mukhoToñ ko haTā kar dekho

dar pe aa.e haiñ jī voToñ ke gadāgar dekho

phir vahī vā'de purāne phir vahī nā’re

phir ye dā’vā toḌ kar le ā.eñge taare

phir bahak jā.eñge muflis bhuuk ke maare

phir se ḳhānā hai tumheñ dhokā to khā kar dekho

dar pe aa.e haiñ jī voToñ ke gadāgar dekho

de rahe ho apnī qismat jin ke hāthoñ meñ

kitnā sach hai jāñch to lo un kī bātoñ meñ

kaun nek insān hai in pāñch sātoñ meñ

Thoñk kar achchhe se achchhe se bajā kar dekho

dar pe aa.e haiñ jī voToñ ke gadāgar dekho

dar pe aae hain ji woTon ke gadagar dekho

mangte hain bhik kaise giDgiDa kar dekho

phir na dekhoge inhen panch baras yaro

in ki surat ko bhi jaoge taras yaro

aaj ji bhar ke karo in ke daras yaro

aaj pas aa ke nazar in se mila kar dekho

dar pe aae hain ji woTon ke gadagar dekho

ab to kahte hain ki pani bhi bharenge ye

jo na ab tak kar sake wo ab karenge ye

ab na wa'de se kabhi apne phirenge ye

kahte hain ek bar phir se aazma kar dekho

dar pe aae hain ji woTon ke gadagar dekho

in mein shamil hain bure bhi aur change bhi

kuchh sharafat ke hain putle kuchh lafange bhi

chand ek ne to karae honge dange bhi

sab ke sab kaise khaDe hain sar jhuka kar dekho

dar pe aae hain ji woTon ke gadagar dekho

in mein rahzan bhi chhupe hain rahbar bhi hain

jahil-o-an-paDh bhi hain ahl-e-nazar bhi hain

machhliyan chhoTi baDi moTe magar bhi hain

in ke mukhDon se mukhoTon ko haTa kar dekho

dar pe aae hain ji woTon ke gadagar dekho

phir wahi wa'de purane phir wahi na’re

phir ye da’wa toD kar le aaenge tare

phir bahak jaenge muflis bhuk ke mare

phir se KHana hai tumhein dhoka to kha kar dekho

dar pe aae hain ji woTon ke gadagar dekho

de rahe ho apni qismat jin ke hathon mein

kitna sach hai jaanch to lo un ki baaton mein

kaun nek insan hai in panch saton mein

Thonk kar achchhe se achchhe se baja kar dekho

dar pe aae hain ji woTon ke gadagar dekho