yaad aur mohabbat

maiñ apne aap ko bahut yaad kar rahā huuñ

kaash maiñ apne paas hotā apne saath

apne kañdhe se haath laTkā.e

ḳhud ko dilāsoñ kā ek tohfa detā

zindagī Table par mere saath baiThī

mujhe dekh kar muskurā rahī hai

vo mujh se bhī ek adad muskurāhaT

kī ḳhvāhish rakhtī hai

lekin shāyad vo nahīñ jāntī

muskurāhaT aur maiñ do baras pahle

alag ho chuke haiñ

ab maiñ apnī purānī tasvīroñ se

nafrat kartā huuñ kyoñ ki

in meñ maujūd shaḳhs muskurā rahā hai

zehn par zor dene se bhī vo vajah

yaad nahīñ aatī jo mujhe

maazī meñ muskurāhaT se navāztī thī

haañ itnā yaad hai ki vo mohabbat nahīñ thī

tum jānte ho mohabbat kyā hai

mohabbat ek joḌe kī pahlī aulād hai

jo parvān chaḌhte hī apnoñ ke

kiye ehsān bhuul jaatī hai

mohabbat glacier hai jo thoḌī sī

garmī se pighal jaatā hai

mohabbat ek beva kī udāsī hai

mohabbat bāñjh aurat kī

aulād kī ḳhvāhish hai

vīrāne meñ apne gaal par bosa

denā mohabbat hai

mohabbat banjar chehre par muskurāhaT kī

fasl ugne kī ḳhvāhish hai

magar merā mohabbat muskurāhaT

aur ḳhvāhishoñ se koī ta'alluq nahīñ

maiñ ḳhud ko DhūñD rahā huuñ

maiñ do baras pahle mohabbat naamī

ek doshīza ke hamrāh gum gayā thā

maiñ aaj bhī ḳhud ko bahut yaad kartā huuñ

main apne aap ko bahut yaad kar raha hun

kash main apne pas hota apne sath

apne kandhe se hath laTkae

KHud ko dilason ka ek tohfa deta

zindagi Table par mere sath baiThi

mujhe dekh kar muskura rahi hai

wo mujh se bhi ek adad muskurahaT

ki KHwahish rakhti hai

lekin shayad wo nahin jaanti

muskurahaT aur main do baras pahle

alag ho chuke hain

ab main apni purani taswiron se

nafrat karta hun kyon ki

in mein maujud shaKHs muskura raha hai

zehn par zor dene se bhi wo wajah

yaad nahin aati jo mujhe

mazi mein muskurahaT se nawazti thi

han itna yaad hai ki wo mohabbat nahin thi

tum jaante ho mohabbat kya hai

mohabbat ek joDe ki pahli aulad hai

jo parwan chaDhte hi apnon ke

kiye ehsan bhul jati hai

mohabbat glacier hai jo thoDi si

garmi se pighal jata hai

mohabbat ek bewa ki udasi hai

mohabbat banjh aurat ki

aulad ki KHwahish hai

virane mein apne gal par bosa

dena mohabbat hai

mohabbat banjar chehre par muskurahaT ki

fasl ugne ki KHwahish hai

magar mera mohabbat muskurahaT

aur KHwahishon se koi ta'alluq nahin

main KHud ko DhunD raha hun

main do baras pahle mohabbat nami

ek doshiza ke hamrah gum gaya tha

main aaj bhi KHud ko bahut yaad karta hun