yaad

dil-e-māyūs meñ hai terī yaad

jaise vīrāna meñ ho ganj-e-nihāñ

jaise māyūsiyoñ kī zulmat meñ

ik shuā-e-umīd ho larzāñ

jaise ḳhāmoshiyoñ meñ sahrā kī

ho sadā-e-ḳhirām-e-jū-e-ravāñ

jaise aarif ke dil meñ nūr-e-ḳhudā

jaise āshiq ke siine meñ armāñ

jaise bīmār ko naved-e-masīh

jaise hātim ko muzhda-e-mehmāñ

jaise nāzuk sī ek kashtī ho

darmiyān-e-kashākash-e-tūfāñ

jaise TuuTe hue khañDar meñ hoñ

baaqī pichhlī imāratoñ ke nishāñ

hoñ chaman meñ bache hue jaise

mausam-e-gul ke kuchh gul o raihāñ

jaise chingārī zer-e-ḳhākistar

jaise ik sho.ala-e-tah-e-dāmāñ

hai tirī yaad zindagī merī

is ko de kar na luuñ maiñ bāġh-e-jināñ

kabhī zāhir hai dil kī dhaḌkan se

kabhī zabt-e-fuġhāñ meñ hai pinhāñ

dard ban kar kabhī hai dil meñ muqīm

kabhī āñkhoñ se ashk ban ke ravāñ

hoñ ġharaz terī yaad se ai dost

hashr-bar-dosh ḳhuld dar-dāmāñ

dil-e-mayus mein hai teri yaad

jaise virana mein ho ganj-e-nihan

jaise mayusiyon ki zulmat mein

ek shua-e-umid ho larzan

jaise KHamoshiyon mein sahra ki

ho sada-e-KHiram-e-ju-e-rawan

jaise aarif ke dil mein nur-e-KHuda

jaise aashiq ke sine mein arman

jaise bimar ko nawed-e-masih

jaise hatim ko muzhda-e-mehman

jaise nazuk si ek kashti ho

darmiyan-e-kashakash-e-tufan

jaise TuTe hue khanDar mein hon

baqi pichhli imaraton ke nishan

hon chaman mein bache hue jaise

mausam-e-gul ke kuchh gul o raihan

jaise chingari zer-e-KHakistar

jaise ek shoala-e-tah-e-daman

hai teri yaad zindagi meri

is ko de kar na lun main bagh-e-jinan

kabhi zahir hai dil ki dhaDkan se

kabhi zabt-e-fughan mein hai pinhan

dard ban kar kabhi hai dil mein muqim

kabhi aankhon se ashk ban ke rawan

hon gharaz teri yaad se ai dost

hashr-bar-dosh KHuld dar-daman