yaad-e-mazi

vo 'ahd-e-guzishta kā dilkash fasāna

gayā chhūT ham se vo rangīñ zamāna

umangeñ javānī kī vo vālihāna

kisī shoḳh kā haa.e vo aanā jaanā

vo hañs hañs ke bijlī girānā kisī kā

jamāl-e-munavvar dikhānā kisī kā

vo chhup-chhup ke gulshan meñ aanā kisī kā

vo nazroñ se bijlī girānā kisī kā

bigaḌ kar vo āñkheñ dikhānā kisī kā

sharārat se mujh ko girānā kisī kā

kabhī ruuTh jaanā kabhī man bhī jaanā

kabhī muñh chiḌānā kabhī muskurānā

vo maḳhmūr āñkheñ vo husn-e-javānī

Tapaktī ho jis se mai-e-arġhavānī

vo dilkash nigāheñ vo shīrīñ-bayānī

vo lutf-e-musalsal shab-e-shādmānī

vo pur-lutf sohbat vo pur-kaif naġhme

ubalte the jis se masarrat ke chashme

vo siine se mujh ko lagānā kisī kā

sharārat se vo gudgudānā kisī kā

vo ġhusse kī sūrat banānā kisī kā

vo muñh pher kar muskurānā kisī kā

shab-e-māh meñ haa.e vo daur-e-sāġhar

vo saaqī kā rangīñ jamāl-e-munavvar

vo tirchhī nigāheñ vo rangīñ adā.eñ

ki bad-mast ho jaa.eñ jin se fazā.eñ

vo abr-e-mohabbat kī dilkash ghaTā.eñ

'zakī' ab kahāñ ahd-e-rangīñ vo paa.eñ

wo 'ahd-e-guzishta ka dilkash fasana

gaya chhuT hum se wo rangin zamana

umangen jawani ki wo walihana

kisi shoKH ka hae wo aana jaana

wo hans hans ke bijli girana kisi ka

jamal-e-munawwar dikhana kisi ka

wo chhup-chhup ke gulshan mein aana kisi ka

wo nazron se bijli girana kisi ka

bigaD kar wo aankhen dikhana kisi ka

shararat se mujh ko girana kisi ka

kabhi ruTh jaana kabhi man bhi jaana

kabhi munh chiDana kabhi muskurana

wo maKHmur aankhen wo husn-e-jawani

Tapakti ho jis se mai-e-arghawani

wo dilkash nigahen wo shirin-bayani

wo lutf-e-musalsal shab-e-shadmani

wo pur-lutf sohbat wo pur-kaif naghme

ubalte the jis se masarrat ke chashme

wo sine se mujh ko lagana kisi ka

shararat se wo gudgudana kisi ka

wo ghusse ki surat banana kisi ka

wo munh pher kar muskurana kisi ka

shab-e-mah mein hae wo daur-e-saghar

wo saqi ka rangin jamal-e-munawwar

wo tirchhi nigahen wo rangin adaen

ki bad-mast ho jaen jin se fazaen

wo abr-e-mohabbat ki dilkash ghaTaen

'zaki' ab kahan ahd-e-rangin wo paen