yaad-e-mazi

zindagī ke siyāh kamre meñ

biitī yādoñ ke chand jugnū haiñ

jo musalsal tasalliyāñ de kar

mujh ko samjhā rahe haiñ barsoñ se

sirf paanā hī shart ishq nahīñ

ishq to vo aziim markaz hai

jis meñ har shai se pyaar hotā hai

jis meñ khonā bhī ik ibādat hai

aur jab jab ye baat sun kar ke

maiñ zarā bhī udaas hotā huuñ

to mirī koTharī kā har konā

TikTikī sā lagā.e dekhe hai

goyā mujh se vo kah rahā ho ye

yād-e-māzī azaab hai lekin

vaqt-e-tanhā.ī yaad ke jugnū

tujh ko ye raushnā.ī dete haiñ

maslahat ye hī dar-haqīqat hai

jo bhī hai rab kī bas ināyat hai

maiñ bhī kuchh muttafiq huuñ ab un se

vaqt-e-tanhā siyāh kamre meñ

yād-e-māzī kī raushnī ke sabab

maiñ ye tanhā.ī jhel saktā huuñ

apne ashkoñ se khel saktā huuñ

aur un sab tamām bātoñ se

ab natīja yahī nikaltā hai

yād-e-māzī bhale azaab sahī

yād-e-māzī ḳhudā kī rahmat hai

zindagi ke siyah kamre mein

biti yaadon ke chand jugnu hain

jo musalsal tasalliyan de kar

mujh ko samjha rahe hain barson se

sirf pana hi shart ishq nahin

ishq to wo azim markaz hai

jis mein har shai se pyar hota hai

jis mein khona bhi ek ibaadat hai

aur jab jab ye baat sun kar ke

main zara bhi udas hota hun

to meri koThari ka har kona

TikTiki sa lagae dekhe hai

goya mujh se wo kah raha ho ye

yaad-e-mazi azab hai lekin

waqt-e-tanhai yaad ke jugnu

tujh ko ye raushnai dete hain

maslahat ye hi dar-haqiqat hai

jo bhi hai rab ki bas inayat hai

main bhi kuchh muttafiq hun ab un se

waqt-e-tanha siyah kamre mein

yaad-e-mazi ki raushni ke sabab

main ye tanhai jhel sakta hun

apne ashkon se khel sakta hun

aur un sab tamam baaton se

ab natija yahi nikalta hai

yaad-e-mazi bhale azab sahi

yaad-e-mazi KHuda ki rahmat hai