yaad-e-rangin

mire mahbūb terī ulfat-e-sādiq pe nāzāñ huuñ

tire husn-e-qayāmat-ḳhez-o-rangīñ kā ġhazal-ḳhvāñ huuñ

magar is terī tarz-e-ajnabiyyat par maiñ hairāñ huuñ

tasallī de kabhī aakar mire qalb-e-pareshāñ ko

sharāb-o-sher meñ Duubī vo bāteñ yaad aatī haiñ

tirī ma.asūm sī ulfat kī ghāteñ yaad aatī haiñ

jo hañste bolte guzrīñ vo rāteñ yaad aatī haiñ

liye phirtā huuñ maiñ āñkhoñ meñ yādoñ ke gulistāñ ko

kahāñ vo din haiñ jab karte the ham bāġhāt kī saireñ

vo sāvan ke mahīne meñ bharī barsāt kī saireñ

lab-e-jū chāñdnī meñ vo suhānī raat kī saireñ

nazar ab DhūñDhtī hai tere husn-e-kaif-sāmāñ ko

in ayyām-e-mohabbat meñ maze kyā kyā nahīñ luuTe

vufūr-e-shauq meñ katre nahīñ kyā maiñ ne gul-būTe

mirā dil toḌne vaale kahīñ terā na dil TuuTe

ḳhudā ke vāste kar yaad apne ahd-o-paimāñ ko

mere mahbub teri ulfat-e-sadiq pe nazan hun

tere husn-e-qayamat-KHez-o-rangin ka ghazal-KHwan hun

magar is teri tarz-e-ajnabiyyat par main hairan hun

tasalli de kabhi aakar mere qalb-e-pareshan ko

sharab-o-sher mein Dubi wo baaten yaad aati hain

teri masum si ulfat ki ghaten yaad aati hain

jo hanste bolte guzrin wo raaten yaad aati hain

liye phirta hun main aankhon mein yaadon ke gulistan ko

kahan wo din hain jab karte the hum baghat ki sairen

wo sawan ke mahine mein bhari barsat ki sairen

lab-e-ju chandni mein wo suhani raat ki sairen

nazar ab DhunDhti hai tere husn-e-kaif-saman ko

in ayyam-e-mohabbat mein maze kya kya nahin luTe

wufur-e-shauq mein katre nahin kya main ne gul-buTe

mera dil toDne wale kahin tera na dil TuTe

KHuda ke waste kar yaad apne ahd-o-paiman ko