yaad

aa.ī jab un kī yaad to aatī chalī ga.ī

har naqsh-e-mā-sivā ko miTātī chalī ga.ī

har manzar-e-jamāl dikhātī chalī ga.ī

jaise unhīñ ko sāmne laatī chalī ga.ī

har vāqi.a qarīb-tar aatā chalā gayā

har shai hasīn-tar nazar aatī chalī ga.ī

vīrāna-e-hayāt ke ek ek goshe meñ

jogan koī sitār bajātī chalī ga.ī

dil phuñk rahā thā ātish-e-zabt-e-firāq se

dīpak ko mai-gusār banātī chalī ga.ī

be-harf o be-hikāyat o be-sāz o be-sadā

rag rag meñ naġhma ban ke samātī chalī ga.ī

jitnā hī kuchh sukūn sā aatā chalā gayā

utnā hī be-qarār banātī chalī ga.ī

kaifiyyatoñ ko hosh sā aatā chalā gayā

be-kaifiyoñ ko niiñd sī aatī chalī ga.ī

kyā kyā na husn-e-yār se shikve the ishq ko

kyā kyā na sharmsār banātī chalī ga.ī

tafrīq-e-husn-o-ishq kā jhagḌā nahīñ rahā

tam.īz-e-qurb-o-buad miTātī chalī ga.ī

maiñ tishna-kām-e-shauq thā piitā chalā gayā

vo mast añkhḌiyoñ se pilātī chalī ga.ī

ik husn-e-be-jihat kī fazā-e-basīt meñ

uḌtī ga.ī mujhe bhī uḌātī chalī ga.ī

phir maiñ huuñ aur ishq kī betābiyāñ 'jigar'

achchhā huā vo niiñd kī maatī chalī ga.ī

aai jab un ki yaad to aati chali gai

har naqsh-e-ma-siwa ko miTati chali gai

har manzar-e-jamal dikhati chali gai

jaise unhin ko samne lati chali gai

har waqia qarib-tar aata chala gaya

har shai hasin-tar nazar aati chali gai

virana-e-hayat ke ek ek goshe mein

jogan koi sitar bajati chali gai

dil phunk raha tha aatish-e-zabt-e-firaq se

dipak ko mai-gusar banati chali gai

be-harf o be-hikayat o be-saz o be-sada

rag rag mein naghma ban ke samati chali gai

jitna hi kuchh sukun sa aata chala gaya

utna hi be-qarar banati chali gai

kaifiyyaton ko hosh sa aata chala gaya

be-kaifiyon ko nind si aati chali gai

kya kya na husn-e-yar se shikwe the ishq ko

kya kya na sharmsar banati chali gai

tafriq-e-husn-o-ishq ka jhagDa nahin raha

tamiz-e-qurb-o-buad miTati chali gai

main tishna-kaam-e-shauq tha pita chala gaya

wo mast ankhDiyon se pilati chali gai

ek husn-e-be-jihat ki faza-e-basit mein

uDti gai mujhe bhi uDati chali gai

phir main hun aur ishq ki betabiyan 'jigar'

achchha hua wo nind ki mati chali gai