yaad

raat oḌhe hue aa.ī hai faqīroñ kā libās

chāñd kashkol-e-gadā.ī kī tarah nādim hai

ek ik saañs kisī naam ke saath aatī hai

ek ik lamha-e-āzād nafas mujrim hai

kaun ye vaqt ke ghūñghaT se bulātā hai mujhe

kis ke maḳhmūr ishāre haiñ ghaTāoñ ke qarīb

kaun aayā hai chaḌhāne ko tamannāoñ ke phuul

in sulagte hue lamhoñ kī chitāoñ ke qarīb

vo to tūfān thii, sailāb ne paalā thā use

us kī mad.hosh umañgoñ kā fusūñ kyā kahiye

thartharāte hue sīmāb kī tafsīr bhī kyā

raqs karte hue sho.ale kā junūñ kyā kahiye

raqs ab ḳhatm huā maut kī vaadī meñ magar

kisī paa.el kī sadā ruuh meñ tābinda hai

chhup gayā apne nihāñ-ḳhāne meñ sūraj lekin

dil meñ sūraj kī ik āvāra kiran zinda hai

kaun jaane ki ye āvāra kiran bhī chhup jaa.e

kaun jaane ki idhar dhund kā bādal na chhaTe

kis ko ma.alūm ki paa.el kī sadā bhī kho jaa.e

kis ko ma.alūm ki ye raat bhī kaaTe na kaTe

zindagī niiñd meñ Duube hue mandir kī tarah

ahd-e-rafta ke har ik but ko liye suutī hai

ghanTiyāñ ab bhī magar bajtī haiñ siine ke qarīb

ab bhī pichhle ko, ka.ī baar sahar hotī hai

raat oDhe hue aai hai faqiron ka libas

chand kashkol-e-gadai ki tarah nadim hai

ek ek sans kisi nam ke sath aati hai

ek ek lamha-e-azad nafas mujrim hai

kaun ye waqt ke ghunghaT se bulata hai mujhe

kis ke maKHmur ishaare hain ghaTaon ke qarib

kaun aaya hai chaDhane ko tamannaon ke phul

in sulagte hue lamhon ki chitaon ke qarib

wo to tufan thi, sailab ne pala tha use

us ki madhosh umangon ka fusun kya kahiye

thartharaate hue simab ki tafsir bhi kya

raqs karte hue shoale ka junun kya kahiye

raqs ab KHatm hua maut ki wadi mein magar

kisi pael ki sada ruh mein tabinda hai

chhup gaya apne nihan-KHane mein suraj lekin

dil mein suraj ki ek aawara kiran zinda hai

kaun jaane ki ye aawara kiran bhi chhup jae

kaun jaane ki idhar dhund ka baadal na chhaTe

kis ko malum ki pael ki sada bhi kho jae

kis ko malum ki ye raat bhi kaTe na kaTe

zindagi nind mein Dube hue mandir ki tarah

ahd-e-rafta ke har ek but ko liye suti hai

ghanTiyan ab bhi magar bajti hain sine ke qarib

ab bhi pichhle ko, kai bar sahar hoti hai