yaad nagar

maiñ os ban ke baras jā.ūñ tere sabze par

maiñ giit ban ke tirī vādiyoñ meñ kho jā.ūñ

bas ek baar bulā le mujhe vatan mere

ki terī ḳhaak ke dāman meñ chhup ke so jā.ūñ

shagufta ghaas meñ ye zard zard nanhe phuul

na jaane kis liye pagDanDiyoñ ko takte haiñ

unheñ ḳhabar hī nahīñ un ko chunñe vaale aaj

gharoñ se duur kisī camp meñ sisakte haiñ

ka.ī gharānoñ kī fariyād is meñ Duub ga.ī

ab is kuñ.eñ pe na aa.egī koī panhārī

kisān khet na sīñcheñge aise paanī se

harī na hogī use pī ke koī phulvārī

yahīñ nadī ke kināre ise dabāyā thā

magar shabānoñ ko vo bārhā nazar aa.ī

haTī jo ret to chamkā vo chāñd sā māthā

chalī havā to vo resham sī zulf lahrā.ī

maiñ tere paañv paḌūñ haath rok le qātil

use na maar jo terī taraf humaktā hai

ye teġh ko bhī khilaunā samajhne vaalā hai

ye la.al pheñk ke añgāra chuus saktā hai

kahā kisī ne ki vo jald lauT ā.eñge

kahā kisī ne ki ummīd ab bahut kam hai

ilāhī Dūbte dil ko zarā sahārā de

mire charāġh kī lau aaj kitnī maddham hai

nibolī niim kī pakkī ab aa.egā sāvan

magar ye giit use aah kaise yaad aayā

vo apnī maañ se lipaT kar na ro sakegā kabhī

na sar pe haath kabhī rakh sakegā māñ-jāyā

sunā hai niiñd meñ vo chauñk chauñk paḌte haiñ

lahū ke daaġh the jin par vo haath jalte haiñ

paḌosiyoñ se ye kah do vo mish.aleñ rakh deñ

ki ek gaañv ke ghar saath saath jalte haiñ

ilāhī shaam ab is gaañv meñ na aane paa.e

ki is ke aate hī dukhiyā.eñ mil ke rotī haiñ

darinde apne bhaToñ meñ dahalne lagte haiñ

havā.eñ koh se Takrā ke jaan khotī hai

diye ke vāste nanhe panāh-gīr na ro

falak pe dekh vo qindīl-e-māh raushan hai

isī fazā meñ mire chāñd tū bhī ubhregā

jo tū hai saath to ġhurbat kī raah raushan hai

tilā.ī ghaas se vaadī meñ thā talātum sā

havā meñ narm shuāoñ kī sarsarāhaT thī

nayā thā chashma-e-mehr aur nayā thā rañg-e-sip.har

har ek goshe meñ lekin ajal kī aahaT thī

havā ne diip bujhāyā hī thā ki niklā chāñd

qalam ko tez chalāo ki ye bhī Duub na jaa.e

ḳhud apne dil ke ujāle kā e'tibār nahīñ

ki ek baar ye jaa.e to phir palaT ke na aa.e

ye chāñdnī kā ujālā ye nīm-shab kā sukūñ

safed gumbad-o-dar duudh meñ nahā.e hue

sitāro koī kahānī kaho ki raat kaTe

na yaad aa.eñ mujhe roz-o-shab bhulā.e hue

main os ban ke baras jaun tere sabze par

main git ban ke teri wadiyon mein kho jaun

bas ek bar bula le mujhe watan mere

ki teri KHak ke daman mein chhup ke so jaun

shagufta ghas mein ye zard zard nanhe phul

na jaane kis liye pagDanDiyon ko takte hain

unhen KHabar hi nahin un ko chunne wale aaj

gharon se dur kisi camp mein sisakte hain

kai gharanon ki fariyaad is mein Dub gai

ab is kunen pe na aaegi koi panhaari

kisan khet na sinchenge aise pani se

hari na hogi use pi ke koi phulwari

yahin nadi ke kinare ise dabaya tha

magar shabanon ko wo barha nazar aai

haTi jo ret to chamka wo chand sa matha

chali hawa to wo resham si zulf lahrai

main tere panw paDun hath rok le qatil

use na mar jo teri taraf humakta hai

ye tegh ko bhi khilauna samajhne wala hai

ye lal phenk ke angara chus sakta hai

kaha kisi ne ki wo jald lauT aaenge

kaha kisi ne ki ummid ab bahut kam hai

ilahi Dubte dil ko zara sahaara de

mere charagh ki lau aaj kitni maddham hai

niboli nim ki pakki ab aaega sawan

magar ye git use aah kaise yaad aaya

wo apni man se lipaT kar na ro sakega kabhi

na sar pe hath kabhi rakh sakega man-jaya

suna hai nind mein wo chaunk chaunk paDte hain

lahu ke dagh the jin par wo hath jalte hain

paDosiyon se ye kah do wo mishalen rakh den

ki ek ganw ke ghar sath sath jalte hain

ilahi sham ab is ganw mein na aane pae

ki is ke aate hi dukhiyaen mil ke roti hain

darinde apne bhaTon mein dahalne lagte hain

hawaen koh se Takra ke jaan khoti hai

diye ke waste nanhe panah-gir na ro

falak pe dekh wo qindil-e-mah raushan hai

isi faza mein mere chand tu bhi ubhrega

jo tu hai sath to ghurbat ki rah raushan hai

tilai ghas se wadi mein tha talatum sa

hawa mein narm shuaon ki sarsarahaT thi

naya tha chashma-e-mehr aur naya tha rang-e-siphar

har ek goshe mein lekin ajal ki aahaT thi

hawa ne dip bujhaya hi tha ki nikla chand

qalam ko tez chalao ki ye bhi Dub na jae

KHud apne dil ke ujale ka e'tibar nahin

ki ek bar ye jae to phir palaT ke na aae

ye chandni ka ujala ye nim-shab ka sukun

safed gumbad-o-dar dudh mein nahae hue

sitaro koi kahani kaho ki raat kaTe

na yaad aaen mujhe roz-o-shab bhulae hue